50

La sciorta mia e toia, o sorecillo,

Tutta è na cosa, e simmo dui pacchiane:

Tu iste a chillo addore de casillo,

Io a Cecca, che de st' arma è caso e pane;

Tu fai zio zio, ed io sospiro e strillo,

Tu mùzzeche ssi fierre, ed io ste mane;

Tu zumpe, io sauto comm' a gatta o cane,

Io senza libertà, tu a sso mastrillo.

A te sbatte lo pietto, a me lo core,

Tu morte aspiette ed io no' spero vita,

Tu chino de paura, io de dolore.

'N chesto sgarrammo: ed è ca tu averraie

Una morte, da Cecca saporita,

Io n' aggio ciento, e non se sazia maie!