50

Se ti ha intention de darme da chiavar,

No domandar cusì i scudi a mier,

Domanda per le cose del dover,

E fa' sì che anca mi ghe possa star.

Cogioni, che me vùstu rovinar?

Mo può far mi, bisognarave haver

L'entrada de Missier Zorzi Corner,

Fia mia, chi te volesse contentar.

– Oh, mi son zentildonna! – El mondo crede

Che sia donna da ben, mo ben per questo

No se te vuol tegnir la to mercede.

Pur se ti vien a qualche precio honesto,

M'attaccarò al partìo, perché po a farlo

In fin qua mi no ho sempre volesto.

Ho dognora credesto

Che ti me sogi a domandar sì ingrosso

Con volerme far far quel che no posso,

Ma daspuò che cognoso

Che ti dissi da seno, cercarò

De slargarme anca mi dal fatto to.

Pur se te chiaverò,

Perché ti possi haver el campo franco,

Te pagherò d'una partìa de banco.

E pur, che vùstu? Almanco,

Dime l'ultimo precio. Orsù via, quanto?

Ti ha inteso za che no vuoi spender tanto,

Perché no son sì spanto

Che vògia darte quel che no se die',

Però domanda el giusto, per to fè.

A mi me par mo che

Do mocenighi sia una bella paga,

E se ti ha nesun mezzo, che t'i daga.

Dàghene pur e laga

Tutti sti to respetti da un canton,

E fa' quel che te disse sto cogion.

Mo mi cazzo, che son

L'homo che ti me vedi, non ho mai

Trovà becco fottù che m'i habbi dai,

E a ti i no te xe assai,

Che ti domandi i scudi a millioni.

Mo che estu, po far mi, più d'una donna?

Cala, cala, cogiona,

Che se ti pij ùna cattiva piega

Ti fa perder el spasso alla bottega.

No aspettar che te prega,

E se ti nol vuol far, stàtene in pase,

E vate far chiavar da chi te piase.