51

Me deze no piatto Ceccarella

De cierte saporite maccarune

Semmenate de zuccaro e cannella,

Cosa da fa' sperire le perzune.

Penzatelo vui tutte cannarune

Quanto fu bona chella menestrella:

Io me ne fice priesto dui voccune,

E le mannaie deritto a le bodella.

Sautaie pe l' allegrezza comm' a grillo,

Ca furono cchiù duce de na manna,

E ghianche comme a latte de cardillo.

Sa ca me sanno buone, e me ne manna.

Mo pozzo dire, comme dice chillo:

“Ammore m' ha pigliato pe la canna !”