5

Eccetto l'homo ogni altra bestia ha ben,

L'altre vien governae dalla Natura,

Che è so mare, so nena, e che ghe ha cura,

Che ghe dà tutto quello che ghe vien.

L'homo delle desgrazie è prima pien

Che l'habbia, se puol dir, preso figura,

L'è pur solo, che sa, che ha sta paura

De tornar, de ressolverse in terren.

Ello ha per guida el senso e la rason,

E se l'è da una banda parzial,

L'altra el tien in continua passion.

Gramo sto viver misero e mortal,

Se la Natura e 'l ciel ne fa sto don

Perche 'l sia fondamento d'ogni mal!