73

Signora mia, vu manizé per tuto

Cussì sto porco infina in le buele,

Donca per far salsizze e mortaele

Vu ve degné d'un animal sì bruto?

Mo mi, che son per vu morto e destruto,

No m'have mai tocà nianche la pele;

Forsi che lu de quelle man sì bele

Se sentì mai d'amor caldo un persuto?

Orsù, s'amazza el porco, e mi son morto

Mille volte per vu, ma ingiustamente,

Che lu muor a rason, mi muoro a torto.

Lu tuttavia ve 'l tegnì sempre arente,

E mi non havì mai nissun conforto

De sì longo servir con tante stente.