9

Cierto si sorzetasse Compà Iunno,

O Iacoviello, o lo poeta Cola,

O si Giovanne de la Carriola

Tornasse n' auta vota a chisto munno,

Co bierze senza fine e senza funno

Cecca mia bella laudarriano sola:

Ca, penta comme a càrdola 'n gaiola,

Ha l' uocchio nigro e lo capillo iunno.

E si campasse mo Bennardiniello,

Museco nfra li buone e nfra li maste,

Le farria na ceccona o no torniello.

Io, che non aggio corde, e manco taste,

Poeta sfortonato e poveriello,

Le faccio na sonata co doie graste.