CANTO NONO

Grannizia dice a lo patrone chelle

Cose che Nora l'have 'nfrocecate,

Che co la zirria zompa fi' a le stelle

E caccia Micco a bone chiattonate;

Nora se scopre e conta le coselle

Fatte pe Micco, ed isso n'ha pietate.

Vace 'n campagna Micco ed è feruto,

E da Nora ch'arriva è soccorruto.

Ora ccà, Musa mia, stace lo punto:

Defresca la mammoria, azzò ch'io dica

Chello che resta a dire de sto cunto,

E scompa docemente sta fatica;

E se mai cchiù me piglio tale assunto

Famme scacare e singheme nemmica,

Pocc'ha tre bote mo c'aggio arragliato,

Me nce ha redutto chi m'ha commannato.

Micco sagliette puro, 'n crosïone,

E Grannizia facette de manera

Che restaie sfatta Nora e lo patrone

Mostranno a Micco sempre bona cera,

Ed azzò c'aggia ognuno 'sfazïone

Le fece mille squase fi' a la sera;

Po' quanno Micco voze guancïare

A no cafuorchio lo facette entrare.

Decenno: «Saglie suso a sto soppigno

E llà m'aspetta, e setta lo portiello,

Ca mo mo saglio e te dongo no pigno

De chello che te va pe cellevriello;

E se n'ommo non sì de stoppa o ligno

Dirraie ca non fo maie zito noviello

Nfra quanta ne facette la natura

C'avesse avuto maie tale ventura».

Micco, che non sapeva lo trattato,

Sagliette suso muto allegramente;

E chi se l'averia maie 'nmacenato,

Se be' fosse uno assai cchiù ch'azzellente?

Quanno lo fenestriello appe serrato

Nora d'avere Micco steva ardente:

Postase na magnosa e na gonnella

Trasette dinto a chella cammarella.

E se be' se senteva spertosare

Commo no crivo lo pietto e lo core,

Ed avea cchiù golìo de l'abbracciare

Ca n'ha golìo campare uno che more,

Puro no piezzo se fece pregare

Decenno: «Aimé, non bòle lo Segnore

(Fatte nillà) ch'io sia da te vasata

Se 'nnanze ad isso non m'hai 'nguadïata».

Ma Micco, che squagliava commo a cera,

Senza resposta l'abbracciava stretta:

Nora, che maie credea sta bona sera,

Puro s'accorda, e s'abbracciaro 'n chietta:

Ca se sentette fare mala cera

Fo pe fate la cosa assaie cchiù netta;

Cossì, dapo' ch'arreto s'è tirato,

Tozza co cchiù gran forza lo castrato.

Grannizia 'ntanto vace a lo patrone

Co l'uocchie pisciarielle e scapillata,

E commo avesse doglia de mattone

Cchiù de na voce 'n capo l'ha chiavata.

«Ah ah, ched è, diss'isso, vaiassone?

La scatolella fuorze s'è scassata?

E non potive fin craie aspettare?

Me vene voglia, affé, de te scannare».

«Ca non è chesso, oimé, state a sentire:

Mara me scura, eccome maretata!

Famme, Signore mio, famme morire

'Nnanze ch'io sia da nullo sbregognata.

Non aggio core manco de lo dire,

Marìtommo ped autro m'ha pigliata:

Vòle che dorma co no gioveniello

Che sta cod isso a chillo cammariello».

«Potta de nnico, che me viene a dire?

Zitto, ch'è fatta a me chesta vregogna!

Ma te ne lo faraggio mo pentire,

Se puro non me dice la menzogna.

Damme la spata, lassame saglire

Llà 'ncoppa pe grattarele la rogna:

Viene co mico tu, saglie ccà suso,

Dov'è sso sbregognato presentuso?!»

Micco che sente tale sbravïare

Piglia priesto la spata e lo brocchiero,

Ca penza lo Segnore voglia fare

Cortellate co quarche Cavaliero;

E tanto corze c'appe a brociolare,

Ma lo Segnore c'have autro penziero

Le dice: «Ferma, ferma, mascauzone,

Quanto t'assesto buono sto ieppone!»

«Ched è patrone mio? L'aggio vasata

Commo mogliere mia cod ogne 'nore,

E se d'autra malizia s'è tentata

Fa carne pe l'aucielle de sto core».

Ma chillo mise mano pe la spata,

Ch'era no gentelommo de valore,

Ed accommenza co na furia strana

Senza la grata a battere la lana.

Micco che bede a buono sinno fare,

E non sa lo triunfo che l'è fatto,

Non sa che dite né che se pescare,

Attoneto restanno e stoppafatto.

Perzò non avette armo d'allancare

Ma se ne scese bello guatto guatto,

E fi' abbascio a la strata appe a li scianche

Sempre de chiatto ciento cuorpe franche.

Po' disse lo Segnore a la zitella:

«Dov'è chill'autto che benea cod isso?

Quanto le faccio n'auta sarciutella

E beo se po' lo zito è chillo o isso!»

Ma Nora de Grannizia ha la gonnella

E fece l'uno e l'autro stare ammisso,

Ca le fece adonare lo vestito

Ca non volea mogliere, ma marito.

E tanto cchiù ca disse: «Non gridare,

Agge piatate de na sfortonata

Che se vorria co Micco maretare

Pe golìo c'have de state 'norata:

D'una che l'ha boluto secotare

Se be' n'è stata sempre maltrattata,

D'una che se non l'have vò morire,

Tanto sto 'ngrato la face sperire».

E pe lo filo le contaie lo cunto

De quanto co Grannizia avea trammato:

E le sortìjo commo voleva appunto,

Perché lo gentelommo era aggarbato,

E pe piatate se pigliaie l'assunto

De trattare sto bello parentato.

Grannizia sente, 'ntorza, crepa e schiatta,

Decenno: «Ah, tradetora, me l'haie fatta!»

E se non fosse ch'essa avea paura

De lo patrone, se sarria sciongata

A muorze ed a rascagne a Nora scura

E l'averria la facce stroppïata.

Lo patrone s'adona ca cottura

N'ha la vaiassa, e vedela arraggiata:

Ride, e Grannizia cchiù n'abbotta, e 'ntanto

A chillo cresce gusto, a chella chianto.

Puro a l'utemo è forza ch'essa sbotte

Decenno: «Tiente, pettola verruta,

Ca pe no vaso me facea sta notte

La contegnosa, ch'era addeboluta!

Mo prega chi le denga quattro botte:

Vide commo nce sta 'ngarzepelluta!

Da dove Ammore sto gioiello sceuze,

Da la Chiazzetta, o vero da le Ceuze?»

Ma lo patrone la fa stare zitto

E dice a Nora: «Puoie da craie nnenante

Venireme ad asciare a pede fitto:

Tanto faraggio ch'averraie st'amante.

E non saraggio a faretel'io schitto

Ma quanta m'ascio ammice, tutte quante,

E nce volimmo tanto trafecare

Che 'n ogne muodo t'aggio a 'nguadïare».

Ntra chisto miezo fo lo Colloniello

Avisato ca già li forasciute

Ievano 'n miezo a no cierto castiello,

Che se iea priesto l'averria cogliute;

Perzò s'era sosuto mateniello

Ed avea tutte l'uommene allestute,

E commo è notte penza d'ammarciare,

Fuorze quarcuno ne potrà pigliare.

Micco, che steva curzo e desperato,

E se la pigliaria co chi se voglia,

Già co tutte le gente era abbïato

Ed avea de commattere gran voglia;

E de manera asciàvase arraggiato,

Ed aveva a lo core tale doglia,

Che se tanno arrevava no squatrone

Averria fatto commo no lïone.

«Dàlle, decea, Fortuna, ecco c'hai gusto

De strazïare Micco poveriello!

Non vasta quanto Ammore le dà sgusto

E sbotanno le va lo cellevriello?

Sìnghele tu perzì cura d'agusto,

Portalo co Grannizia a lo maciello,

Non te stracquare maie, pazza verruta,

Iettare sopra a cuotto acqua bolluta».

Ma Nora quanno sa ca va 'n campagna

(Quanto pò 'n core femmenesco ammore!)

Tutta se pisa e tutta se rascagna

E se scorda de quanto avea valore.

Po' dice: «Dove vaie senza compagna,

Senza chella che t'ha dinto lo core?

Vengo, core mio bello, io vengo, o Micco,

E 'n miezo li nemmice e te me 'nficco.

«Non voglio te feresca forasciuto,

Voglio Ammore pe me te fera schitto,

E 'nnanze singhe da nullo feruto

Io sia zollata, e siale beneditto.

Non sarrà maie sso cuorpo tuo cogliuto

Se n'è còuto sto core arzo ed affritto,

Ca se be' m'uodie sempre e faie despietto

Te saraggio rotella e parapietto».

E da chell'ora 'scìjo da la cetate

Pe se 'nmescare co la 'nfantaria,

Ma perché non sapea buone le strate

Sola e de notte, po', sgarraie la via,

E iette dove stevano alloggiate

Cierte uommene de granne cortesia,

Che l'alloggiaro e fecero avertuta

Ca chella notte proprio era nasciuta.

«Perché, dissero, tanta de li lupe

So' pe sti vosche e pe chiste vallune,

Che conca passa pe tale sgarrupe

Se lo magnano vivo 'n duie voccune,

E se non sì magnato e non derupe

Sì pigliato allo manco da latrune,

Che la notte e lo iuorno pe sse strate

Pe fare caccia staceno agguattate.

«Perzò puoie stare ccà tanto alloggiato

Quanto te piacerà de te nce stare,

Ca da nuie sempre mai te sarà dato

La stanzia, strama, e letto e da magnare:

Perché lo munno avimmo cammenato

E frostiere nce piace d'aiutare,

Rennenno a duppio chelle cortesie

Che foro fatte a nui pe ss'autre bie.

«Ma vuie de dove site, e dove ghire

Pensate, ccà becino o cchiù lontano?

Decitemillo, se ve piace dire,

E site gentelommo o popolano?»

«Songo, le decette essa, pe servire

A bostra Segnoria, Napoletano,

E bench'io sia nasciuto nfra lo grasso

Mo so' pezzente, e <o> bao poco da 'rasso».

«Pe cierto site tanto accrïanzato

E tale 'nfanzia avite che derria

Ca site Cavaliere tetolato

E merdate piacere e cortesia.

E se site pezzente ma 'norato,

S'io potesse co buie me cagnaria,

Ca le recchezze mo tanto prezzate

So' de lo core vipere arraggiate.

«Oh, quanto sott'a seta e tela d'oro

E nfra museche, balle, e feste e iuoco

Stace desgusto, arraggia e gran martoro,

E ferite ha lo core, e l'arma fuoco!

Che penzate che sia chillo tresoro

E servetute avere ad ogne luoco

Ed essere 'lustrissemo e famuso,

E magnare no funcio 'ntossecuso?

«No povero fa ricco no carrino,

S'ha pane e caso magna rïalato,

No' le fa male l'acqua se n'ha bino

E n'ha sospetto che sea 'ntossecato;

S'esce la sera a notte o ben mattino

Non ha paura d'essere arrobbato,

Lo vierno cchiù che fleba l'è la frisa,

E po' la 'state va scauzo e 'n cammisa.

«Non se le dace n'aglio che non sia

Sbarrettato da Rienzo o da Masiello,

O sia chiammato tune o Vossoria,

O pe nomme o sescanno commo auciello;

Quanno sta pe la casa o pe la via

Non se le vota maie lo cellevriello

D'essere affezïale o tetolato,

Ca l'uno e l'autro dà pe no docato».

«E lo vero pe cierto, essa decette,

Ma chello essere ricco e gran Segnore,

Avere cuocchie, lettiche e seggette,

E quanto vòle a tutte quante l'ore,

Avere uommene e femmene soggette

Me creo ch'allegra de sorte lo core

Che quant'have lo munno aspre tormiente

Non ponno 'ntrovolare sti contiente.

«Ma lo povero sempre ha da pensare

Commo acchietta tornise a lo pesone,

Ca schitto no carrino c'ha da dare

Vace pe la saccocciola 'mpresone;

Quanno have carne e la vò cocenare

O non ha lardo o non have cravone

'Nfine sempre le manca quarche cosa

E lo cuorpo e la mente maie reposa.

«Sarrà la casa soia no vascetiello

Che le serve pe casa e pe cantina,

L'aseno sta cod isso e lo porciello,

E lo cane e la gatta e la gallina;

Pe lietto tenarà no sacconciello

Ed averance a capo la latrina,

E fommosa cossì la cemmenera

Che meglio le sarria stare 'n galera.

«S'have mogliere o figlie, o sfortunato!

Chella vede na robba a la commare

E dice: - Ecco, marito m'hanno dato

Che maie na strenga me pòte accattare!

Chille vanno pe 'ntuorno a lo pignato

E che sia cuotto non vonno aspettare,

Chella chiagne c'ha povero marito

E chille c'hanno ricco l'appetito.

«Canta lo gallo ed abbaia lo cane,

Gualia la gatta, lo sommiero arraglia,

Chiagne lo peccerillo ca vò pane

E se sente no miglio la vattaglia.

Po' quanno stracco e zitto ognuno stane

Miezo muorto se corca a chella paglia,

E quanno crede stare arreposato

Se sose, ca lo figlio l'ha cacato».

Ma stanno de ste cose a chiacchiarare

Sentettero n'allucco e no remmore,

No dire: «Ammazza, ammazza», no sparare

Che metteva gran chella e gran terrore;

Perzò se ièro priesto ad affacciare

E Nora, che lo fuoco have a lo core,

Scennette a chiazza, e bisto li sordate

Ieze cercanno Micco per le strate.

Perché lucea la luna e se poteva

Vedere commo miezo iuorno fosse,

E pe dinto le spate se ne ieva

Ch'erano già de sango tutte rosse:

E tant'ammore e lo golìo poteva

Che sarria scesa a le tartaree fosse

Quanno penzasse llà de lo trovare,

E non mancava mai de lo cercare.

E l'asciaie puro, ma l'asciaie che steva

Cchiù da chill'auto munno che da chisto,

Perché ntanno pe tanno l'accedeva

No forasciuto, che 'n terra l'ha bisto:

Che s'essa a tale ponto non correva

Lo negozio de Micco era già listo,

Ch'era lo poveriello sciulïato

E stea da li compagne assai smammato.

Nora repara chella cortellata

E zompa armosa, e 'mmiezo se le 'mpizza,

(Oh, quanto pòte Ammore!) na stoccata

De lo nemmico dà proprio a la zizza,

Che fo de tale sorte 'nnevenata

Che senza 'scire de sango na stizza

Lo chiavaie 'n terra, e l'arma, arrasso sia,

Tutta arraggiata se pigliaie la via.

Ma perché rutto no pede cadenno

S'aveva Micco, e puro stea feruto,

Steva benedecenno e mardecenno

Chi l'aiutava e chi l'avea sarciuto;

Nora, che bede fatto lo tremenno

Cuerpo ch'acciso ha già lo forasciuto,

Se vota ad isso commo mamma a figlia,

L'afferra stritto e 'mbraccio se lo piglia.

E dove ad essa dezero ricietto

Co tanto ammore, ch'è poco lontano,

Lo porta Nora, e corcalo a lo lietto

Quanto meglio potette chiano chiano:

Addove tutte lo pigliaro a pietto

De covernarencillo fi' ch'è sano,

Pe fare, commo disse, 'n crosïone,

Sempre piacere a tutte le perzone.

Dove s'ascia non sape Micco dire

Mentre le fanno tanta cortesia,

E co no gran golìo sta de sentire

Chi lo valente gioveniello sia:

Pare che lo canosca, e non sa dire

Addove; e Nora co sta malatia

Spera de fare tanto, se non more,

Ch'isso pe causa soa scarfe lo core.

E co cchiù delegenzia a tuorno l'era

Ca no' la mosca 'ntuorno a na menestra,

No' l'abandona maie matina e sera

Cchiù che navetta de telaro destra.

Cossì l'asena corre de carrera

Quanno passato abrile vace 'n iestra:

E che non face Ammore a sierve suoie,

Ca le pognie da reto commo a buoie!