CANTO OTTAVO

Micco conta a Grannizia quanto ha fatto

Ped essa, e dice ca non ha raggione

De le fare sto bello schiacco matto,

Lassannelo pe chillo sbarvatone;

Nora vace a guastare quanto è fatto

Pocca nce la vò dare lo patrone,

Saglie e move a Grannizia l'appetito

E le 'nmezza a sgarrare lo marito.

Ma schitto 'n cielo restava la stella

Che se chiama Dïana 'mpoetisco,

E se ne steva ianca e rossolella

L'Aurora pazzianno a chillo frisco,

Già se scetava ogn'arma al munno bella

E deva pe preiezza quarche sisco,

Ogne vaiassa puro era levata

Pe cocinare e fare la colata;

Quanno lo scuro Micco era sosuto

Co na collera granne e cardacia,

Ca chella notte n'avea maie dormuto

E pe lo sdegno e pe la gelosia,

E ietta fuoco e stace resoluto

De se sganare mo la fantasia

Co la 'ngrata Grannizia, e po' pregare

A lo patrone, nce la voglia dare.

E ghìjosene a la casa e tozzolaie:

Ma perché lo patrone stea corcato

Grannizia a la fenestra s'affacciaie,

Penzanno fosse l'autro 'nnammorato.

Micco pe arraggia no' la salutaie:

Ma dapo' ch'ha cchiù bote sosperato

Le dice: «Be', Grannizia, commo hai core

Lassare a me pe no noviello ammore?

«Lassare a Micco pe no gioveniello

Che non sai de dov'è né chi se sia

Micco che fece 'nnante a lo castiello

N'atto, pe te, de gran cavallaria:

Quanno mettenno mano a no cortiello

Sbentrai no ciuccio 'mmiezo a chella via,

Che senza descrezione a la 'mpensata

T'allordaie no dobretto de colata.

«E quanno te chiammaie scrofa, varvera,

Ietta-cantato e guitta, Carmosina,

Tu saie ca pe le fare na galera

A dece rimme ieze na mattina:

Po' vedenno ca nullo taglio nc'era,

Ch'era 'ntanata, e pare ca 'nnevina,

Io pe darete gusto, o core 'ngrata,

Te le fice na bella magrïata.

«Che po' nce stiette, oimé, tocca e non tocca

Da farene lo iuoco de la corda:

E tu me lasse mo cossì de brocca

E de nullo servizio t'allecorda!

Ma che dico io? Quant'apro cchiù la vocca

Tanto appile l'aurecchie e me sì sorda!

O servizie, o speranze iute a brenna,

Non saccio chi me tene e non me 'mpenna.

«Oh quanto porria dicere, e sto zitto,

De chello che fi' mo nce aggio refuso!

E strenghe e lazze e filo, che st'affritto

Vorzillo mio pe te maie stette chiuso;

Baccalà co la sauza e perzì fritto

Te portava, e le zeppole annascuso,

Lupine, e ciento cose da magnare,

Mo ch'è paidato non c'è cchiù compare».

Averria ditto cchiù, ma lo Segnore,

Ch'avea sentuto sto tatanïare,

Perché de la vaiassa sa l'ammore

Trasìjo 'n sospetto, e vennese a 'ffacciare.

Micco le dice: «Schiavo e servetore,

Se v'è còmmoto v'aggio da parlare».

«De grazia, isso respose, viene ad auto»,

E Micco trase e saglie ne no sauto.

E sagliuto che fo disse: «Sacciate

Ch 'io songo Micco Passaro chiammato,

Ed aggio fatto a punia e cortellate,

Commo sa lo Mandracchio e lo Mercato;

Ma s'io ne dieze a l'uommene stoccate

Assaie peo songo stato spertosato

Co l'hocchie, aimé, de ssa paisana mia,

De ssa zitella de Vossegnoria.

«Chesta ha fatto cravone de sto core,

E chisto pietto na vitrera ha fatto:

Chessa me fa strillare a tutte l'ore

Commo c'a marzo 'n iestra va lo gatto;

Chessa m'have levato lo colore

Commo malato che face lo tratto,

E creo ca priesto st'arma àuza le bele

Se non songo marito a sta crodele.

«Perzò vengo da Napole a pregare

Ne facite servizio e cortesia.

Deh, non me fare cchiù sparpatïare

Pe st'ammorosa mia gran malatia!

Ma pe grazia v'aggiate a contentare

Che chesta senga la mogliere mia:

E perché non rieste scommodato

La voglio nuda e senza no toccato».

Lo gentelommo c'avea gran golìo

Levarese da 'nanze chell'arpia

Respose: «Affé te giuro, figlio mio,

C'aggio pietate de ssa malatia:

E pocca te la pozzo sanar'io,

E co sparagno de la robba mia.

Voglio che l'aggie a sfastio de fortuna

'Nnanze che co le corna esca la Luna».

Se Micco avette gusto no' lo dico:

Fa' cunto ca 'ngrassato ha lo permone,

E perché l'ha cacciato d'ogne 'ntrico

Rengrazia, e cossì dice a lo patrone:

«Mo n'arefece trovo che m'è ammico

E faccio fare na fede d'attone,

E torno ccà volanno commo auciello,

Vaso la zita e 'mpìzzole l'aniello».

Da l'autra banna la vaiassa 'ntorza

E manco ne pò scennere la manna

Ma vede Nora e affacciase a la 'ncorza

Ed a quanto have 'n cuorpo apre la canna.

Dice ca lo patrone le fa forza

Che piglie Micco, ca se no la scanna:

Essa 'nnanze se sbentra co no spito,

Né vò sto grissolaffio pe marito.

Nora dice che fegna d'obedire,

Conzenta a tutto, fora ch'a lo vaso:

Ma che llà dintro lo faccia trasire,

Ca farrà chello che dirrà cchiù adaso:

Perché ha penzato cose da stordire

E lo zito, che penza bello e raso

Venire a nozze, restarà, sta' sauda,

Co li diente ielate e l'arma cauda.

Grannizia che s'asciava già piccata

Decette: «Bene mio viene a lo tardo,

Ca la porta asciaraie spaparanzata,

E t'annasconno dereto a lo lardo:

Pocca pe craie s'hanno la posta data

Che saglia Micco, ed io de collera ardo,

Ca se sagliesse e me trovasse sola

Che porria fare io povera fegliola?»

Ha ragione la scura figliolella,

Ch' è de tre tridece anne ed have ancora

Le primme aurecchie, tant' è peccerella,

E da lo munno non è 'sciuta ancora!

Considerare puoi quant'era bella

E la pacienzia che nce avette Nora:

Che pe priesto lassare sta Megera

Partette e disse: «Io torno commo è sera».

E se non fosse pe gabbare Micco

Non ce tornava cchiù 'n vita 'ternale:

Perzò quanno dà fuoco a lo lammicco

La Notte, e stilla l'acqua cordïale,

Perché lo Sole pe gran caudo sicco

Aspetta li remmedie a lo 'spetale,

Essa venette bello zitto e muta

E dov'era Grannizia fo trasuta.

Quanno Grannizia vedde essa venire

Pe gran preiezza se ne iea 'mbrodetto,

E guatta guatta la fece saglire

A chiavarese dintro no retretto

Dove mai lo patrone solea ghire:

Perzò avea 'ndirizzato llà lo lietto

E disse: «Bene mio, ccà t'arreposa,

Ca da magnare mo porto quarcosa».

E perché cuotto dui pollastri aveva,

Un'arrostuto e n'autro 'n grattinato,

E lo patrone magnare voleva,

Ca l'auto riesto steva apparecchiato,

Disse, strillanno quanto più poteva:

«La gatta lo pollastro s'ha pigliato!

Fruste, fruste! Oimé scura, oimé meschina,

Curre, Segnore, abbascio a la cantina».

Lo patrone de furia ben corrette,

Ma la gatta stea 'nchiusa a no cascione,

E lo pollastro caudo caudo avette

Nora, e magnava 'ncoppa no bancone:

La burla lo scurisso se gliottette

Comme se fosse stato no cestone,

E no' le fece quarche 'ntomacata

Pe buon respetto ch'era nmaretata.

Grannizia ieva mo da suso abbascio

Commo navetta de lo tessetore,

E iéale 'ntuorno commo auciello ad ascio

Pe l'allumare 'mpietto quarche ardore;

Issa sta vergognosa e l'uoccbio vascio,

Fegnennose tremare a tutte l'ore,

Chella se 'nzecca e dice: «Ahi sorte scura,

Vasame, piglia core, e c'hai paura?»

Nora, se be' le parze de pigliare

Na medicina co lo taccariello,

Se facette armo e iezela a basare,

Ca 'ntese che le iea pe cellevriello;

Po' le decette: «Non voglio tentare,

Grannizia mia, de rompere castiello,

Perché a la casa mia sarisse accisa

Se non mostrasse a tutti la cammisa».

Ed essa, che se vede desperata

D'avere chello de che sta speruta,

Fa lo capo de sopra e la 'norata,

Decenno: «Sì, va' ca me nce hai cogliuta,

Sto meza morta mo ca m'haie vasata,

Uh, mara me, commo non so' foiuta!

E se pe craie tu non me daie l'aniello

Vao commo desperata a no vordiello».

Co chesto Nora vennese a sarvare

E steze chella notte ben secura,

Ca non potte Grannizia scommogliare

Che capriccio s'asciava, o che natura:

E po', de cchiù, non vozese spogliare

Decenno ca lo fa perché ha paura,

E 'nnanze che se iessero a corcare

Accossì Nora mesese a parlare:

«Facce mia d'oro, core de sto pietto,

Pocca a me te piacette de faorire

E buoie, de tutte a sfastio et a dispietto,

Pigliare a mene, e Micco faie sperire:

Voglio che dintro a chisto stisso lietto

Craie, quanno saglie, facce isso venire;

Dille ch'aspetta, e a me n'avisa destra,

Ma primmo 'nzerra buono ogne fenestra.

«Ca po' nce sarraggio io da parte toia

E commo fusse tu 'nfenta faraggio;

Tu a patrùneto curre e l'uocchie stoia

Commo chiagnisse, e di': - Che sorta c'aggio!

Mara me scura! S'avesse la foia

Commo sommera lo mese de maggio

Non averria trovato no marito

De tale chella e de tale appetito!

«- Sacce, oimé scura, sacce, oimé, Segnore,

Ca lo marito mio vò l'aiutante,

Perché dice ca isso non ha core

De fare, commo s'usa, la via 'nnante:

Ha portato perzò no servetore

E non s'è bregognato, lo forfante,

Dìreme ca pe 'scire da sto 'ntrico

Vòle che chillo primma stia co mico -.

«Po' lassa fare a me se lo patrone

Vene isso o fa chiammare la Iostizia

Pe carfettare sto piezzo d'anchione

Che se penzava gaudere Grannizia

E se non haie po' chella 'sfazïone

Che buoie, né resca netta sta malizia,

Puozze morire tu, speranza amata,

Pe fare sempre st'arma negrecata».

Ed accossì, co chisto appontamiento,

Stezero chella notte senza fare

De 'nnammorate nullo compremiento,

E la cchiù granne chella fo basare:

Ca, commo disse, Nora stette attiento

Che Grannizia non iesse a manïare

E s'adonasse, e gran paura n'have,

Ch'a lo screttorio suo non c'era chiave.

E se Grannizia ievase votanno,

E mo na gamma 'ncuollo le iettava,

Mo bello bello se ieva 'nzeccanno

E no vraccio o na coscia pezzecava,

Essa 'nfenta facea tanto cchiù tanno

Ch'era addormuta e forte roncïava,

Iettanno, commo a tale 'nnammorato,

Quarche contrasospiro sperfummato.

A Micco 'ntanto iea pe cellevriello

Che duono avea a la zita da saglire,

Se cauze e scarpe, o se no iepponciello,

E non sa proprio dove se spartire;

E lo peo ca sta sbriscio e poveriello

E sto penziero guasta lo dormire:

Chi pò dormire co ste spine a lato,

Senza tornise e stare 'nnammorato?