CANTO PRIMMO

Io canto la montagna de Parnaso

E li fuonte e ciardine c'have a lato,

E a che mandrullo chi nce saglie a caso

Pe decreto de Febo è 'ncaforchiato.

Musa, è la quinta vota che de naso

Io dongo a st'acqua, mo che so' assetato!

Se vuoie crescere tu quanto te devo,

Famme na grazia, sisca mentre vevo.

E tu che saglie e scinne a boglia toia

Da llà 'ncoppa, e non haie chi te lo beta,

Segno' D<on> Dieco, e nne la grazia soia

Te tene lo gran Re d'ogne Poeta,

O de le Muse cuccopinto e gioia,

Ausoléia dall'a pe fi' a la nzeta,

Ca si me vene netta, n'autro iuorno

Lo nomme tuo lavoro a meglio tuorno.

Avea già co lo tiempo e co la sciorte

Iocato li meglio anne de la vita,

E perzo fi' a li fielece e le sporte

Senza vencere maie nulla partita,

Tristo dinto e peo fore de la corte,

Ca pe tutto è bertù vrenna o redita;

A l'ùtemo no cricco desperato

Me disse: muta luoco e muta stato.

Dove iarraggio, 'n Franza o a Lommardia?

Nigro me, ca pe tutto nc'è travaglio!

Povera e nuda vaie, Filosofia!

Dovonca arrive non t'è dato n'aglio,

Chi la vertù canosce non ha cria!

Con chi pò dare aiuto non c'è taglio:

Pe tutto la Fortuna te trabocca,

E maie non àscie chi te sputa 'mmocca!

Cossì dicenno, vénneme 'n crapiccio

De ire dove Febo è gran Signore,

E sta a la serpentina co lo miccio

Pe fare bene a ogn'ommo de valore;

E quanto bello na matina alliccio,

Napole mio lassanno, e pe faore

De Febo stisso, assaie lieto e felice

'N quinnece mise sto vïaggio fice.

'N miezo a lo munno (e dica chi le piace

Ca 'm–Beozia o a Gragnano sta 'Lecona)

Senza autro a tuorno na montagna stace,

Dove non pò saglire ogne perzona;

'N chesta né caudo maie né friddo face,

'N chesta maie non chiovélleca né tròna,

Ma sempe è maggio, e perzò sempe siente

Arraglie de felice e de contiente.

'Ncoppa a la cimma soia è no palazzo,

O bene mio, che maiestria de spanto!

Dove le Muse e Febo co sollazzo

Ad ogne tiempo stanno 'n riso e 'n canto.

Non è opera già de quatto a mazzo!

De le fràveche tutte porta vanto

Che foro fatte a forza de tornise

A tiempo de Romane o de Franzise.

Tutto de preta pommece e mautune

E fatto, a la zemina lavorato,

A quatto cante, a quatto torrïune,

Che pare no castiello spiccecato.

Saglie a la porta pe tre scalantrune

E truove na cocina a primmo 'ntrato,

Dove chi arriva friddo e s'ascia stracco

Se pò scarfare e 'nchìrese lo sacco:

Perché, tra l'autre cose degne e belle

Che Febo ha 'n uso, primmo che poeta

Le parle, vò che s'énchia le bodelle,

Ca non s'accorda Museca e Dïeta.

O stile de 'nnauzàrese a le stelle!

O che piatosa deïtà descreta!

All'autre parte canta puro e berna,

Ca allanche se no' spienne a na taverna.

Passata sta cocina àscie na sala,

Dinto na stalla, accanto a na despenza;

Da llà pe no recuoncolo se cala

A no soppigno, fatto p'azzellenza;

Ecco, a na gallaria vaie pe na scala,

(Perdòneme lo Duca de Sciorenza!)

Ca chesta a pede chiuppo passa chella,

C'ha tanto nomme che sia ricca e bella.

Statoe, non dico niente: si <fi'> pitture

A desfazio de Fidia e Tizïano;

Libre a bizzeffa, a fascio le scritture,

Quale stampate e quale fatte a mano;

Le perne e gioie a tómmola, e mesure

Che no' lo pò contare 'nciegno umano:

Lo sanno chille a chi fece Minerva

Lo vagno d'uoglio e la sepposta d'erva.

Lloco sta Febo, et ha le sore a lato,

Ch'ognuna tene 'mmano no stromiento;

Da na gran corte stace 'ntornïato

D'uommene vertoluse a ciento a ciento.

Io, dapo' che llà 'ncoppa fui arrivato,

Traso la porta, ch'è d'oro e d'argiento,

E 'mmiezo a doie colonne veo no mutto:

«Chi trase aseno miezo, n'esce tutto».

Passo cchiù 'nnanze, e tanto giro 'ntuorno

C'arrivo dove Febo stea seduto,

E a lo prenzipio aviette tanto scuorno

Che pe spanto e stopore restaie muto;

Po' m'addenocchio, e dìcole: «Buon iuorno».

Isso m'abbraccia e dice: «Benmenuto!

Io saccio perché biene e de che haie voglia:

Frate, haie trovato propio carne e foglia!»

Io lo rengrazio, et isso lebrecaie:

«Io voglio che te iove sto vïaggio,

E azzò de me te laude sempe maie

Ecco, t'abbraccio, e azzèttote pe paggio.

Va' t'arreposa, mo; sta sera o craie

Voglio c'agge no buono veveraggio».

Che core pienze che faciette, tanno,

Se be' ogne punto me pareva n'anno?

La sera aspetto, commo tavernaro

Ch'aspetta lo percaccio, e po' non vene.

Ecco, lo Sole se 'ncaforchia a maro,

Foienno pe li dèbete che tene;

Ecco, lo preggia l'Arba, e lustro e chiaro

Se mostra: io conto l'ore. O Dio, che pene!

Quanno Febo me chiamma, e bò che trasa

A no bello ciardino de sta casa.

Llà tu vide na rosa moscarella

Che 'mmiezo nc'è nasciuto no cetrulo,

Llà bide c'a na fico troianella

Nce sponta a corneciello lo fasulo:

Vide da na lattuca mortarella

'Scire la falanghina de Pezzulo,

E da no milo sciuoccolo o amarena

Pezze de caso cchiù ca n'è l'arena.

Spallère ha de cocozze e molegnane,

Prègole de cetrola e de cepolle,

Quatre de mercolella e maiorane,

Conzierte de vorracce e fogliamolle,

Pe mmiezo no gran frùscio de fontane

Che d'ogne banna l'acqua scorre e bolle;

Una, tra l'autre, nc'è de forza granne,

Che pe tre mascarune l'acqua spanne.

De tutte tre me fece abbeverare,

Azzò de tre manere io me potesse

A la quintana correre, e provare

Co tutte li poete e poetesse:

O acque spotestate, o acque rare,

Acque de gran vertù (chi lo credesse?)

Che sùbbeto stampato novamente

Fuie no poeta lubreco azzellente!

Eccote ciento, mo, Griece e Latine,

Ciento Cecilïane e Provenzale,

Vecco ciento masàute Sciorentine

Che càuzano ad Apollo li stivale;

'Mbrosolïaro cchiù de tre matine,

Ca sta grazia c'aviette àppero a male,

Decenno: che tra lloro entre 'n dozzana

N'ommo de Puorto, è cosa troppo strana.

Ma de chesso se corzero lo Tasso,

Lo Cariceo, lo Rota e lo Tansillo,

E Sannazaro fece gran fracasso,

Ch'a fare a punia nce mancaie tantillo;

Io co sta spalla sùbbeto me lasso

E dico: «Eilà, se be' so' peccerillo

Aggio armo de no granne, e pe natura

Maie de nullo valente appe paura.

«Co lecienzia d'Apollo a sto paiese

Pò vevere chi vòle allegramente,

O Spagnuolo, o Todisco, o sia Franzese,

Vasta che sia de miereto e balente;

Ca lo sommiero ch'a fare se mese

Chest'acqua, de vertù tant'azzellente,

Pe tutte voze fare la fontana,

No' schitto pe la Grezia e pe Toscana.

«Le Muse vanno dove so' chiammate,

Ca no' stanno co buie co lo strommiento,

E quanta vote a me se so' 'nzeccate

Cose hanno fatto lustre comm'argiento;

Le parole de Napole 'mpastate

Non songo, frate mio, d'oro pommiento,

Ma de zuccaro e mèle: e Famma vola

Se fanno a tutte lengue cannavòla.

«Ma, ca non fosse niente quanto dico,

Mentre che Apollo no' l'have pe male

Ed have gusto, e sta buono co mmico,

Perché facite vuie de lo fiscale?

Co le chellete vostre io non me 'ntrico,

Né nce aggio che spartire manco sale:

Io scrivo commo parlo, e la fortuna

Pò portare a me puro fi' a la luna.

«Siano tutte li vuostre e quinci e unquanco

E l'Ostro e l'Astro e cotillo e cotella,

Ch'io pe me, tanto, non ne voglio manco,

De tant'isce bellezze, na stizzella.

Tanta patacche avesse ad ogne Banco

Quanta aggio vuce a Napole mia bella:

Vuce chiantute de la maglia vecchia,

C'hanno gran forza, ed énchieno l'aurecchia».

Responnere voleva no Toscano,

Ma lo Bernia, che steva llà becino,

'Nmocca le mese sùbbeto la mano

E disse: «Egli ha raggion quest'uomiccino!»

Appriesso se ne venne chiano chiano

Cesare Caporale, Perogino,

E me tiraie, dicenno: «Mazzafranca

Da ccà e da llà, se no ve rompo n'anca!

«Quanta remmure! Quanta 'nfettamiente!

Sbattano lloro; viene tu co mmico,

Ca le parole toie songo strommiento,

Ed io te voglio sempe ped ammico.

Trase dove è la Famma, aggie l'attiento,

E trase o pe la chiazza o pe lo vico,

Ca poco 'mporta, o se nce vaie vestuto

De panno de Gragnano o de velluto».

Mentre accossì dicea lo Caporale

Arrivaie a lo Fonte Pegaseo

Dove se stea lavanno li pedale

Chillo che addefecaie lo Coliseo,

Mentre cantanno cierto matrecale

Steva Anfïone co lo tracio Arfeo,

Aspettanno che l'aseno poeta,

Comm'avea ditto, cacasse moneta.

Le Muse 'ntuorno 'ntuorno aveano stise

Li mantesine pe se le pigliare,

Ca le Muse perzì vonno tornise

Quanno da vero vòleno cantare;

Io pe chesto vedere llà me mise

Ma 'n cagno de moneta ecco spilare

Quatto poemma veo de sicco 'n sicco,

La e .

Ma chelle e l'autre che boleano agresta,

Avenno viste ca no' nc'era taglio,

Se sosèro e scacaro chella festa

E de lo canto scompèro lo staglio;

E me vennèro a me pe na menesta

Li quatto libre vierde commo n'aglio,

Che serveno pe fede de Notaro

Ca le Muse co mmico prattecaro.

Io stoppafatto de vedere chello

C'avea veduto, disse: «O Caporale,

Non me fare vota' lo cellevriello:

Di', commo fa ste cose st'animale?

E dimme s'è cavallo o s'èie auciello,

Pocca ha le 'scelle, che buie chiammat'ale».

«E no ciuccio, disse isso, e fa ste prove

Pe preveleggio che le deze Giove:

«Quanno chille Giagante caparrune,

Uommene gruosse, de la maglia antica,

Pe fare co li Deie a secozzune

Fecero chella tanto gran fatica,

Ammontonanno chille gran petrune

Pe se ne ire fi' 'n Cielo 'n lettica,

Giove li suoie, che stevano ccà 'n terra,

Chiammaie, che se screvessero a la guerra.

«Satore, Semedeie, Faune e Servane

A la 'ncorza nce ièro tutte quante,

Lassanno munte, vuosche, grutte e tane,

Che foro, uh quanta, fra cavalle e fante!

La 'nfantaria nce voze tre semmane

Ad arrivare, l'autre ièro 'nnante,

Perché iezero tutte da Marchise,

Cravaccate a cierte asene puglise.

«Arrivate che foro, voze fare

La mostra, e bisto ch'era assaie fornuto

A la battaglia facette sonare,

Ca lo nnemmico puro era sagliuto:

E se be' le poteva vrociolare

Tutte, Giove, da llà, co no sternuto,

Vò vedere sta gente commo vaglia,

Pocca è tanto arrogante, a la vattaglia.

«Li Giagante perzì s'erano puoste

Commo se deve stare 'nn ordenanza,

E tutte quante, smargiassune e tuoste,

Aspettanno lo suono de la danza.

Dice lo capo lloro: — So' li nuoste

Li Ciele! Io strippo mo co chesta lanza

Giove con tutte li suoie caporale:

E buie mannate l'autre a lo 'spitale —.

«Ma perché a le bagaglie li Giagante

Portato aveano ancora asene assaie,

Chisto aseno, de l'autre cchiù arragliante,

Che de l'asene nuostre s'addonaie,

Priesto sautanno se facette 'nnante

E gorghïanno sùbbeto arragliaie:

Chille de Giove che chisto sentèro

Ad arragliare tutte se mettèro.

«E facettero tante gran fracasse,

E tale fummo, co le besse, e biento,

Che chille vozzacchiune babuasse

Crésero cierto quarche trademiento,

O cadesse lo cielo e le sciaccasse

De tale sciorte che non iove agniento:

E de paura tutte se cacaro,

E pe chella montagna vrociolaro.

«E commo, quanno chiove, na gran lava

Arvole e prete vróciola e roina,

Cossì, mentre sta gente vrociolava,

Appriesso ogne montagna se strascina;

Che de manera tale le bottava

Che cadettero tutte a la marina,

E bive s'atterraro a chello muollo,

E stanno mo co le montagne 'ncuollo.

«Ma lo sommiero che chesto causaie,

Ch'è chisto, commo vide, ccà presente,

Giove da lo pericolo sarvaie

E lo facette poeta valente;

Le dìjo le 'scelle, e sùbbeto volaie

Dapo' che l'appe fatto la patente

Che pozza li poete addottorare,

E comm'haie visto, poemme sfornare.

«S'avisse voglia fàrete dottore

De li poete che stanno 'n Parnaso,

Pe fare vierze a tutte quante l'ore,

E da coppa e da vascio, e forte e adaso,

Se vuoie ch'isso te 'nnàuze e faccia 'nore,

Dàlle sotta la coda quarche baso:

Ma singhe accuorto, frate, e stamme attiento,

No' auzare vela quanno scioscia viento!»

Io tanno volea dire pe resposta

Ca non me curo de m'addottorare,

Ecco lo Magagnate pe la posta,

E córzemo dov'era a scravaccare;

Ca portaie ad Apollo na composta

Che pe parte d'agresta (o cose rare!)

Nc'erano a la spagnola le chitarre,

Li carosielle, le scoppette e smarre.

Apollo l'appe a caro, ed ordenaie

Che stanzia, stramma e lietto se le desse,

E la bella composta se stipaie

Pe quanno quarche Musa prena 'scesse.

Po' se sedette a tavola e magnaie

Gran cose, ma fra l'autre certe allesse

Dinto li maccarune 'mmottonate,

Che lo Coccaio aveva cocenate.

E mentre isso le deta se liccava,

E 'mmocca autre faceano spotazzella,

La Serena de Napole cantava

De contràuto na brava villanella;

No cierto Giallonardo le sonava

L'arpa, ch'isso accacciaie famosa e bella;

E pe fare conzierto assaie cchiù tunno

Sonaie lo colascione Compà Iunno.