CANTO SECUNNO

Scompùto c'appe Apollo de magnare,

Non commo fanno cierte cannarute

Che de 'nchire la panza fi' a crepare

Teneno pe grannezza e pe bertute,

Ma quanto vasta schitto pe campare,

Commo fanno le gente cchiù sapute,

Iezemo nuie perzìne a lo teniello,

A bedere s'è sano lo vodiello.

Dove, magnato avenno nuie perzìne,

De lo cchiù e de lo manco se parlaie;

E me disse uno: «Va de duie carrine

Ca na cosa de niente tu non saie?

Pocca te picche, vì se nce 'nnevìne:

De quanto pe lo munno vìppeto haie,

Crovara e grieco ed autro sciuscio fino,

Quale te pare lo cchiù meglio vino?»

Io me teniette tanno sbregognato,

Non credenno d'asciare la resposta,

Ma quanno 'n capo m'appe assaie raspato

Fice armo, e disse co na facce tosta:

«No' schitto no tarì, ma no docato,

Se tu vuoie ciammellare, frate, apposta,

Ca nce 'nnevìno. Apre l'arecchie, siente:

Lo meglio è chillo che non costa niente».

«Haie raggione, disse isso, e te prommecco

Ca tenere te puoie ommo saccente,

E boglio mantenere ch'è no becco

Chi lo contrario dice, e ca ne mente».

Io pigliato armo, mo, niente autro aspecco

Pe bolere mostrareme valente,

E dico: «Ora decite tutte a tunno,

Chi è la cchiù cruda fèra de lo munno?»

Chi disse lo cerviero e chi la lonza,

Chi l'urzo, chi la tigre e lo lione,

Un autro disse, ed io nce apposto n'onza,

Ca chisso è lupo. «O povero vracone,

Io le respose, avisse na caionza,

Liéie primmo e studia Vartolo o Iasone,

Ca truove commentato a tutta botta

Ca la cchiù cruda è chella che n'è cotta!»

Stoppafatte ed attonete restaro

Quanno accossì trincato me vedèro,

E l'uno a l'autro 'n facce se mmiraro

E no poco scornate se sosèro;

Lo Caporale mio l'avette a caro,

Ca m'era ammico, ed era ammico vero,

E me portaie cod isso fi' a lo parco

Addove Apollo iea tiranno d'arco.

Eie lo parco no bello ciardino:

Che Pardo, che Ranciuose de Castiglia?

Che starza de Caserta e d'Avellino,

Dove besogna fare arco le ciglia?

Che, becino Sciorenza, Pratolino,

Che la natura fa ghire a la striglia?

Tutte chisse so' niente a pietto a chisto,

Ma no' lo credarrà chi no' l'ha bisto.

Vallune peccerille e montagnelle,

Voschette, macchie e sciumme vide, e stagne;

Ccà sciaureïano rose moscarelle,

Llà t'allegrano l'uocchie li papagne,

Pe l'acqua anatre, cigne e paparelle,

Liepare e crapie so' pe le campagne,

E pe serve e pe grutte e pe sepale

Ogne sciorte nc'è chiusa d'animale.

Martore a buonne cchiù, coniglie uh quante!,

Le zòccole e foìne a mmorra vanno,

Puorce sarvagge nce ne vide tante

Ch'a contarele manco vasta n'anno;

De cierve 'ntise ca seie anne 'nnante

Nc'erano assaie, ma po' facenno danno

Febo le deze ausilio, a pena avenno

Tiempo no mese a sarcenas coglienno.

Li poverielle, affritte e desperate,

Non trovanno recietto pe le serve,

Ch'autre animale avevano accopate

In coieto possesso d'acque e d'erve,

Facettero conziglio, e consortate

De dare fine a tante pene acerve,

De pare accordio resorvèro 'n frutto

Cercare a le cità sarvo connutto.

Mannaro 'Mmasciature, e ll'è la sciorte

Sore carnale, et hanno 'sfazïone,

Ca li Sinnece l'apreno le porte

E accoglieno con granne affrezïone.

Chi dàsse all'arte e chi se mette 'n corte,

Chi deventa sanzaro e chi boffone,

'Nzomma ognuno se 'nnustria pe campare

E fa ogne ciervo commo vede fare.

'N poco tiempo 'mprenaro, e perché spisso

La 'mmagenazïone fa lo caso,

Fecero razza, che restaie ammisso

Ogne marito, e ne tornaie marvaso:

Ca nullo figlio è simele a se stisso,

E d'ommo avea la facce co lo naso;

Cossì foro 'n commune de parere

Ch'accidessero tutte le mogliere.

Ma no miedeco buono e letterato

Disse: «Vascia ste mano, ca cchiù bote

Sto mmedesemo caso s'è trovato,

Ca lo penziero grannemente pòte:

Quanno le cerve avite vuie carcato,

Se be' da l'uommen'erano remmote,

Puro, penzanno a lloro fermamente,

Ve so' nate li figlie defferente».

Chesto mancaie l'arraggia uneverzale,

E a sficcagliare alliegro ognuno torna;

Poco a poco la forma bestïale

Se perde, e nullo cchiù nasce co corna.

Pur ha non saccio che de l'animale,

Né pe 'nciuria o vregogna maie se scorna:

Ora sacciate mo, gente pacchiana,

Perché so' tanta cierve 'n forma omana.

Ora a lo parco mo tornanno a ghire,

Che de tant'animale è zippo e chino,

Che cierto vide cosa da stopire

Ped ogne strata e ped ogne cammino;

Tra l'aute, siente mo se vuoie stordire,

Nc'è no gruosso e maiale babuino,

E me contaro cierto no stopore,

Ca chisso ioca a schiacche da dottore;

E che no iuorno stea co lo Boscano

Iocanno, e che le deze schiacco matto:

Chillo pe sdigno bello àuza la mano,

Tùffe!, no scoppolone tunno e chiatto;

Torna a ghiocare, e mentre have pe mano

(Se ferma) n'autro bello e digno tratto,

Le tene mente e stace päuruso,

E méttese la mano a lo caruso.

Fu d'Apollo e de l'autre che bedèro

Tale lo riso ch'adesa creparo,

Ed accossì redenno se ne ièro

E lo gattomaimone assaie laudaro.

'N fine lo riesto de lo munno è zero

Quanno non have lo Parnaso a paro,

Dove no' schitto l'ommo sape e 'ntenne,

Ma n'aseno perzì 'scorre e comprenne.

Po', camminanno no poco cchiù 'nnante,

Vedenno Apollo, se l'addenocchiaie

L'animale che chiammano alifante,

E fu chillo che Alcippe già figliaie;

Apollo po' pigliaie, ma co li guante,

No serpe che li piede le vasaie,

Lo serpe ch'a le guerre marsïane

Figliaie na vaiassella de Romane.

No lèparo po' venne, ch'a la guerra

De Serse avea figliato na iommenta,

E pe la coda chillo serpe afferra

E commattere 'nzieme fanno 'nfenta:

Ch'ogn'animale che stace llà 'n terra

Pe lo gusto d'Apollo suda e stenta;

Po' na ciaccona na lopa abballaie,

E fu chella che Romolo allattaie.

Cchiù 'nnante, dinto na cert'acqua fresca,

Asciàiemo de ranonchie no squatrone;

E dissero, cantanno a la todesca:

«Gottermorghe mael, bonnì patrone»;

E fecero ad Apollo na moresca,

Che le piacquette, e dìjole no cianfrone,

Ch'erano figlie, s'io non faccio arrore,

A Rita, figlia de lo 'Mparatore.

Cocciolïanno vennero li cane

Che comm'aucielle pe l'airo volaro

Lo iuorno che le gente maumettanne

La gran Costantenobole pigliaro,

E dissero ad Apollo ca lo pane

Che le devano 'n corte sapea amaro,

Perché li panettiere marranchine

'Mmescavano a lo grano li lupine.

Chi quanto se vedette porria dire

Pe tale parco cose mostrüose?

Ped ogne pizzo te vedive 'scire

Da ridere e <a> crepare ciento cose:

Ccà senza capo l'ommo vide ghire,

Llà co doie capo e doie corna famose,

Chisto ha facce de cane o puorco, e chillo

De varvaianne, sporteglione o grillo.

Nc'era chi schitto aveva n'uocchio 'n fronte,

Chi pe parte de vraccia avea doie 'scelle,

Chi granne e gruosso che parea no monte,

Chi tantillo, e reiéa co le stanfelle;

Uno aveva le gamme 'nzieme agghionte,

N'autro le braccia longhe fi' a le stelle,

Chillo pare no voie e chisto ciuccio,

Chillo vozzacchio e chisto Mastro Muccio.

Ma tutto chesto niente me parette

A fronte a n'ommo de facce lionata,

C'avea doie lengue 'mmocca, e nce facette

Vedere cosa da nullo penzata:

Tutt'a no tiempo co l'una dicette

Na storia, e co chell'autra na cantata

Fece d'aucielle, tanto prencepale

Che parette d'aucielle natorale.

«Da li campe felice che pe sciorte,

Disse, co doppia lengua se raggiona,

Io so' mannato a la 'ncorrenno forte

'Nnanze a bostra magnifeca corona,

Perché, sentuto ca ped ogne corte

Puro a doie lengue parla ogne perzona,

Te pregano che facce banno regio

Che nullo assurpe tale prevelegio.

«Ch'a nuie chisto è no duono natorale,

Con che meglio spalifeca la mente,

A l'autre èie arte, e se ne serve a male,

Che s'una è doce l'autra è po' pognente;

Leva, Signore mio, st'usanza tale,

E no' lassare sporchia de sta gente:

Sparafónna, te prego, sta canaglia

Che 'nnante cóse, e da derèto taglia».

Chesto sentuto Apollo, tanno tanno

Lo penziero a 'Restòfane dechiara,

Comm'aggia da iettare chillo banno

Isso che fare sa la tarantàra.

Ecco, ciento tù–tù stordire fanno,

Ecco ca grida, ad auta voce e chiara.

Corre ogne peccerillo a sto ciammiello,

E corre ogn'artesciano e fa rotiello.

Dice: «Non sia nesciuno ommo vivente,

De qual se voglia connezione e stato,

Che parle co doie lengue doppiamente,

Se no 'n culo a lo munno è confinato».

Ecco no strillo: «Non ne saccio niente!»

Ma 'n chesto n'autro greciglio s'è levato,

E a Febo dice Avidio: «Benaggia oie!

Curre, ca no sommiero è fatto voie!»

«Sarrà na metamorfose de tante,

Respose Febo, c'haie racuoto e scritto».

«Se non vide lo vero lloco 'nnante,

Lébreca, io mora pe non ghire a mitto;

Crìdeme, ca non so' quarche 'gnorante,

Ca chi smedolla chello c'aggio ditto,

E no' le fa la 'mmidia quarche bozza,

Trova lo sale dinto la cocozza».

Va Febo a lo remmore chiano chiano

E trova l'ortolano da llà 'ntuorno

Che boléa sficcagliare no Toscano

Che le scaudava l'uno e l'autro cuorno;

Ma quanno vedde Apollo tenne 'n mano,

Che no' l'avesse fatto quacche scuorno,

Se be' have l'uocchie commo na cometa,

E l'ammenaccia e mózzeca le deta.

Apollo che bedette lo motivo,

Comm'a Signore saputo e prodente,

Volenno che 'n aterno senga vivo

Chi 'n corte soia resce ommo valente,

Zennaie lo Sciorentino ch'era arcivo

Che se 'nzeccasse ad isso rente rente;

Chiamma po' l'ortolano e l'addomanna

Qual è la spina che lo pogne 'n canna.

«Signore, disse, io songo ommo 'norato,

Né maie fice la strata de Cornito,

Maie Martino da nullo fuie chiammato,

Maie pe no ciervo fuie mostrato a dito:

Mo sto Toscano, che sia strascinato!,

Co sta scrofa, che tene lo prodito,

Me vonno fare 'ntuorno na cartella

Ch'alloggie co li piecore a Forcella».

'Ntennette Apollo che se volea dire,

Ma pe non dare scànnaro a le sore

Dice: «Mo mo lo cunto puoie scompire,

Ch'io pozza remmediarete a lo 'nore:

Tratanto a lo ciardino tu puoie ghire,

Cuoglie fasule, e torna fra doie ore».

Partuto, chiamma a parte la mogliere,

E lo 'mbruoglio pe filo vò sapere.

Disse essa: «Puro che me sia sarvata

La vita, e che la facce da Signore,

Te sarrà tutta quanta scommogliata

La chella che m'ha puosto a sto remmore.

Sto Sciorentino, oimmé, co na varrata

Dinto a le chiocche m'ha ficcato Ammore:

Tu saie lo mulo, già, capetïato

Chi è, ca manco a tene ha perdonato.

«Io mo, che non potea cchiù semmolare

Ca cresceva ogne ghiuorno l'appetito,

Pregaie st'ommo da bene che raspare

Volesse de sta rogna lo prodito;

Ed isso ch'è mastrone e lo sa fare

Non voze refotare lo partito,

E me disse che asciasse tiempo e luoco

Ca l'acqua isso iettava a tanto fuoco.

«Ma perché Miccariello sempe maie

Me venne appriesso, e canzo non me deva,

Tale malizia a chisto 'nfrocecaie,

Che 'nnanze ad isso fare lo poteva:

E saglire a na fico l'aiutaie

E le disse che quanno me vedeva

Che llà sotta a maritemo parlava

Dicesse commo chillo me 'mprenava.

«Fu ditto e fatto: io chiammo Miccariello,

E chisto dice: — Tiénte, scostomato!

Non te vreguogne fare lo vordiello

Co na mogliere a chisto scampagnato? —

E 'n capo le tiraie no ficociello

Dicenno: — Fuie da lloco, sbregognato! —

Micco non sape mo che l'è sortuto

E dice a me: — Ched è, chisto è 'mpazzuto?

«— E 'mpazzuto na cùfece! tu schitto

Non saie quanto sta fico sape fare:

Se tu vide co mmico uno ccà fitto,

Da llà cierto dirraie me vò 'mprenare.

Ora sàglience 'ncoppa zitto zitto,

Mo ch'isso scenne, e bide che te pare:

Saglie, va', ca dirraie per vita mia

Ca chisso fa co mmico vescazzia. —

«— E possibele chesso? — isso decette.

— No' lo sapea, lo boglio mo vedere! —

E sciso che fu chisto, isso sagliette,

E nuie duie nce pigliàvamo piacere.

Ma quanno da llà 'ncoppa isso vedette

Disse, oimmé: — Chesto non è stravedere,

Chesto è lo vero! Ferma, tradetore!

Ferma, ch'a tutte duie caccio lo core! —

«— Sta' zitto! — io le diceva — ch'è la fico

Che fa st'affetto, ma po' n'è lo vero:

Tu saie commo deceva chisto ammico

De te, che non te ieva pe penziero —.

Ma sciso che parea fauzo nnemmico

Trovaie carreco ancora lo sommiero,

E compriso, ma tardo, lo corrivo,

Strilla e bòle de nuie fare no crivo».

Ne rise Apollo, ma no' spaporaie

Pe non dare cchiù armo a la trincata,

E lo Poeta 'mpresone mannaie

Facennole na bona sbravïata;

Po' la fauza mogliere connannaie

Che pe tutto Parnaso sia frustata,

Si de la fico la fatazïone

Non crede Micco, e fa remmessïone.

Po' disse: «Olà, chiammateme lo Franco,

Che benga co lo Modio 'n compagnia,

Ca voglio che dechiareno a lo mmanco

Chi lo cornuto e che lo cuorno sia;

Non se venna lo nigro pe lo ghianco,

Ch'io pe me tanto so' de fantasia

Che non stenga de l'uommene 'norate

La vregogna a le pettole accorciate.

«Pare ch'argiento vivo sia lo 'nore,

E stia co la gonnella commogliato,

E se a quarche guaguina vene omore

De se l'auzare, sia sparafonnato.

Che corpa ha l'ommo se l'oro o l'ammore

Chella fa 'scire da lo semmenato?

O s'isso le dà canzo e l'ha boluto

Tanno sia n'arce becco, arce cornuto».