CANTO SETTEMO

Cerriglio se ne fuie pe la gran guerra,

Po' trova Carmosina, e se ne vanno;

Sarchia entra trïonfante a chella terra

E scarcera le gente che nce stanno.

A mmaro cade Carmosina e 'n terra

No darfino la porta; sbarca tanno

Cerriglio a Frorio; Sarchia fa tornare

Ognuno a la soa forma, e sta a sguazzare.

Musa, mo vienetenne co no cato

Zippo dell'acqua fresca d'Alecona,

Ca songo tutto 'n cuorpo desseccato,

E tiesseme a la 'mpressa na corona;

Mo m'abbesogna d'essere aiutato,

Mo sì ca me vuoie fa' na cera bona,

Azzò pozza scompire de cantare,

Ca la coda è cchiù forte a scortecare.

Cerriglio sfortonato fece aprire

La porta fauza de la strettolella,

Azzò non fosse visto a lo fuire

Da quarche spia o quarche sentenella;

Co isso Cociniello voze ire,

'Nzembra co ll'aute de ciappa e de sella,

E le steva aspettanno Patron Luca

A lo Mantracchio co na gran felluca.

Ievano tutte quante adaso adaso

Che manco se sentea scarponïare,

Accappucciato ognuno a ffi' a lo naso

Comme a chille che sòleno arrobbare:

Co lloro se portaino pane e caso

E bino, azzò potesseno campare

Pe lo vïaggio, a ffi' che chella rota

De la fortuna ll'auza n'auta vota.

E mentre ieano tutte zitto e mutto,

No surzo d'acqua vevere voleva

Cerriglio, e s'accostaie a chillo butto

Addove d'acqua na gran furia 'sceva,

Quanno sentìje da dinto a lo connutto

Na voce lagremosa che diceva:

«Io Cecca so', e te cerco perdonanza

Ca te aggio fatta ssa mala crëanza».

Quanno Cerriglio sta voce sentette

Restaie commo a chiafeo tutto 'ncantato,

E lo gran chianto tene' non potette

E bolanno appe ognuno perdonato;

Ogne ncompagno miezo da sé 'scette,

Ch'appe ogne uno a restare speretato,

Quanno appare' vediste Carmosina

Co na stanfella, e 'n capo na mappina.

Tanno lo Re a essa addommannaie

De lo negozio, e comm'era passato;

Da ll'aco a ffi' a lo filo ella contaie,

E Rienzo cchiù d'ogn'auto appe scusato.

E isso a perdonarele tornaie,

Ma non pe chesto non steva accorato,

Anze, co chesta nova ch'appe avuta,

Fu comm'è 'ncoppa a cuotto acqua volluta.

Po' fuino iute, e a lo maro arrivate

E se 'mmarcaie ognuno lagremanno.

Appero priesto l'àncore tirate,

E a la fortuna 'mpotere se danno;

L'argiento muollo co li rimme sgrate

Rompeno, ma non sanno addove vanno:

Vanno addove la sciorta e lo destino

O lontano le portano, o vicino.

E mente va Cerriglio e li compagne,

Con chella varca de male contiente,

Aranno de lo maro le campagne

'Mpotere a la fortuna et a li viente,

Io torno a Sarchia, che da li carcagne

Chino de contentezza a ffi' a li diente

Era co Cola e Iacovo pe 'ntrare

A lo campo de vino, e trïonfare.

L'auciello ch'era vrache pe cavallo

Sarchia se serve, e se nge mette 'ncoppa;

'Ncuollo se mese no vestito giallo,

E se portava lo gran Cola 'n groppa;

'N mano tenea de vruoccolo no tallo

Pe scettro, e 'nnante Iacovo na coppa,

Ca l'avea dato afficio de coppiero,

E ghiea a ccavallo 'ncoppa a no sommiero.

'N capo s'aveva posta na corona

De vruoccole spicate a la smargiassa,

E 'nnanze a isso ieva ogne mperzona

Facenno largo, azzò che Sarchia passa.

Ognuno le facette cera bona;

Sulo na certa mardetta vaiassa

Ch'a llo trasi' la porta, da lo muro

'N capo le devacaie no pisciaturo.

Isso se pigliaie collera, e 'nzorfato

Se mostraie buono e se mese a gridare:

Ma Cola l'appe sùbbeto pracato,

Ca si no se voleva desperare,

E disse: «Sempre vene temperato

Co lo desgusto lo gusto, e l'amare

Cose vanno a trova' sempe le doce,

Cchiù che non corre lècora a la noce».

Ma po' con tutte chelle gente armate

Se ne trasette comme a 'Mparatore:

Fuino le porte llà spaparanzate

Pe ffa' trasi' sso granne vencetore.

Comme tutte le gente fuino 'ntrate

Gridaino: «Viva Sarchia, gran Signore»,

E llà corzeno tanta a mille a mille

A ffa' allegrezza co sische e co strille.

Po' iette a raperire lo castiello

E fece asci' da dinto a la gaiola

Li duie presune, Mase e Menechiello,

Ch'avevano d'asci' gran cannavola;

Po' scravaccaie da lo cavallo auciello

Et ordenaie che co Schirosso Cola

lesse a piglia' no buono arciulo chino

De chello gran licore tanto fino.

Po' commannaie che priesto se mettesse

Na tavola pe ffare gra' bazzara,

Et ognuno la panza s'allestesse

Pe smorfire, e la canna se prepara;

Che ghiettano li giacche co l'allesse

E pigliano lo spito e la cocchiara,

E a la 'ncorrenno ognuno affacennato

Chi scocchiarea e chi scumma lo pignato.

E mentre chiste ccà vanno allestenno

Chillo banchetto pe scrofonïare,

Torno a Cerriglio, che ghieva correnno

Pe chillo guorfo, e s'appe ad annegare;

E Carmosina, che ghieva vedenno

Dinto a chell'acqua si potea 'ncappare

No pesce, mentre la mano stennette

La varca s'abboccaie e nge cadette.

Sùbbeto lesto venne no darfino

E se la 'ntorzaie 'ncoppa a lo scartiello,

E bolanno pigliaie lo cammino

Pe coppa a ll'acqua, comme fosse auciello;

Commo a lo Sciatamone fu becino

All'onna le raprette no portiello;

Isso llà 'ntraie, e fece da la schena

Carmosina cade' 'ncoppa a l'arena.

Essa restaie sorresseta e storduta,

Po' ghiea pe coppa a chella arena sperta,

Tutta tremmanno e meza 'nzallanuta

Quanno scoprìje na porta che stea aperta;

Essa anemo se dette, e llà trasuta

Fu pe non ghire sempe maie deserta,

Po' fu da lo patrone de la casa

Accòuta, e llà pe sempe fu rommasa.

Chisto patrone era ommo vertoluso,

Che capo allietto fu da li pasture.

Ommo fedele, cortese e ammoruso

De quanta appeno maie covernature;

Chisto cchiù d'uno fa resta' confuso

Co le parole adorose de sciure

E quanno canta pare n'auto Orfeo,

E ffa quarcuno rommane' chiafeo.

Ma tornanno a lo Re male contente,

Che pe paura de non s'annegare

Se conzegliaie co tutte chelle gente

De vole' 'n terra la varca accostare;

Scoprìje lo Regno de lo suo parente,

E a chillo puorto voze i' a sbarcare

Che Frorio nomme aveva, da chell'ora

Che fatto fu da la Regina Frora.

Frorïo mo lo venne ad affrontare

E le fece carizze e 'nore assaie,

E co isso lo fece llà restare,

E po' lo connortaie de chille guaie.

Et io porzì abbesogna ccà lassare

Sta gente co li lloro catalaie,

E di' 'n quatto parole priesto priesto

De Sarchiapone tutto ll'auto riesto.

Schirosso era venuto co lo vino

'Nnante a l'aroie famuso vencetore;

Chillo lo fece mettere vecino

A lo musso de Peppo e a lo Dottore.

Ma Tonno, mo, ch'era no gran chiappino,

Sentette da lontano lo gra' adore,

E corze, e cchiù d'ogn'auto isso sorchiaie

Et a la primma forma retornaie.

L'aute perzì, zoè lo gatto e l'urzo,

Pe la vertute de la marvasia

(Che 'mparte lloro n'appero no surzo)

Tornaino gente 'mmiezzo a chella via;

Maravegliato ogn'ommo llà fu curzo

E bedde chella gran fattocchiaria

Sanare, e tanno tutto quanto ammisso

Sarchia rommase, che parea de isso.

Po' pregaie Marte ch'a Giove parlasse

E facesse torna' Cicco comm'era,

Pocca isso è lo dio de li smargiasse

E Sarchia d'isso porta la bannera.

Ma Giove, mo, pe non fa' cchiù fracasse

La grazia fece co na bona cera:

Ma ch'ogne ghiuorno, fece fa' stromiento,

Che ghiesse Cicco a chillo alloggiamiento.

Perzò se vedea sempre spessïare <spassïare>

Pe dinto e fore e pe bascio e pe suso,

Ca voleva lo vuto sodesfare,

Ca si no bello sarria stato fuso.

'Nfine se vedde llà ommo tornare

Commo era primmo, ma stea assaie confuso;

Sarchia le disse: «Ched haie a lo musso?»

E tanno Cicco se facette russo.

Po' le respose e disse: «Sto 'nzignale

Me l'ha fatto l'aniello de lo naso».

Isso le disse: «Va' via, bestïale,

Che fuste <fusse> (o brava cosa) ccà rommaso!

E te haie fatto tira', brutto anemale,

Comme a no sorecillo da lo caso.

Ora va', priesto, e fatte diece vagne,

Ca fiete! Ca si no co nuie non magne».

Isso corre a lavarese la facce

E pe ghire a la 'mpressa appe a cadere,

Perché sentea l'adore de migliacce

E bolea priesto ìrele a bedere;

Vedde venire cierte sanguinacce

E isso priesto se corze a sedere:

Sarchia lo vede e fa ch'ogn'ommo dica:

«A magna' non se va senza fatica».

«Curre, l'è ditto, curre a faticare,

E non ave' a la 'mpressa chesta allanca!

Aiutange a lo manco a cocinare

E non passare pe la maglia franca:

Miettete tu perzì a scocchiarïare,

E non ave' paura ca te manca,

Che tanto avisse voglia de smorfire

Quanta nge vonno ccà robbe venire!»

Isso accommenza tutto affacennato

A bota' spite et a scioscia' lo fuoco:

Co na cocchiara scumma ogne mpignato

E fa lo scarco sopra ogn'auto cuoco;

Chello che le pareva cocinato

Se lo magnava annascuso a lo bruoco,

E pe fa' priesto tutto s'appe cuotto

E s'abbottaie commo a no ranavuotto.

Po' lo gran Sarchiapone fa sonare

Na caudara a recòuta co no cuorno,

Azzò se iesse ognuno ad assettare

'N tavola, pe filera, 'ntuorno 'ntuorno.

Ognuno corze, e possese a gridare

E dicea: «Ccà se pozza fare iuorno!»

Po' li mappole priesto s'accorciaro

E de le brache le strenghe spontaro.

Ccà vedive na frotta spettorate,

E sorchiavano vruodo a buonne cchiù;

Da llà cierte aute vedive allancate

Che avarriano gliottuto lo Perù;

Da n'auta banna cierte 'mbrïacate

E scostomatamente fanno: «Bu».

E 'n crosïone ognuno magna e sberna,

Che de no Regno è fatta na taverna.