CANTO SIESTO

Nora sciaccata chiagne pe lo lietto

E Micco trotta co la compagnia,

E pe lo fuoco che l'arde lo pietto

Se resta arreto, e po' sperde la via.

De notte co fatica ascia recietto

Addove dice Napole che sia;

Le gente che non sanno ch'è sperduto

Credeno cierto se ne sia foiuto.

Ma mentre Micco ammarcia e vò ferire

Nora stace a lo lietto ed è feruta,

E perché resta se sente morire,

E Micco co lo spireto secuta.

Po' sola chiagne, ed accomenza a dire:

«Se lo fuoco a sto core non astuta

E la funa che st'arma m'ha legata

No' rompe Ammore, io 'n tutto so' <s>barata.

«O crudo Ammore, se te piglie gusto

De tenere a sto pietto na carcara,

Fa' ch'isso aggi'autro caudo che d'arrusto,

E pe me bolla commo na caudara!

O crudo Ammore, fa' lo piso iusto,

Aggia isso parte de sta pena ammara:

O tutte ardimmo 'ncappate a no visco,

O, sciòuto, ognun'aggia lo core frisco.

«Ah, cano Ammore (se te pozzo dire,

Ammore, pocca sì tanto crudele)

Commo puoi fare, e commo puoi soffrire

Che me sia reso tuosseco pe mele?

Commo vuoi che secùte chi a fuire

Da me sempre schiegate have le bele?

Deh, singhe iusto, e fanne la mennetta,

Se n' è tornata iunco sta saietta!

«Che parlo, oimé, che parlo? Isso è già iuto

Ed ha quanto desidera arrevato,

Già li frutte d'ammore have cogliuto,

Già la vaiassa s'have 'nguadïato.

Ah che te venga lo male feruto,

Vaiassa, scrofa, che me l'hai levato!

Ma che m'have levato? Che dich'io?

Sempre fo d'autro Micco, e no' lo mio!

«Sì ca me l'ha levato, ca porria,

Se fosse ccà, darele n'autro assauto,

E n'è gran cosa ca lo venciarria,

C'aggio venciute cose de cchiù 'n auto:

Ma s'io me soso da sta malattia

Dongo fi' lloco sùbeto no sauto,

E tanta marcancegne voglio fare

Ch'ogne designo v'aggio a stroppiare.

«E sarrà maie lo vero che 'nzorato

Micco mio bello sia co na vaiassa?

Chillo che tutto Puorto e lo Mercato

De valenzia a pede chiuppo passa!

Chillo che tanto tiempo aggio pregato

E de tornise le darria na cassa:

Zitto, zitto, fa' voto ch'io no' mora,

Ca vedarimmo che sa fare Nora!

«Fosse morta lo iuorno ch'a Pistase

Faciste chella bella valenzia,

Quanno co n'ancarella dui vastase

Schiaffaste 'n terra, 'n miezo chella via:

Chillo iuorno cornuto che remmase

Arza pe te e feruta st'arma mia,

Co st'arraggia che m'ascio e sto martiello,

Ca no' me votarria lo cellevriello.

«E martiello pe chi? Pe na guaguina,

Pe na vaiassa ietta-cantariello,

Pe na guattara sozza de cocina,

Vommeco de 'spitale e de vordiello!

Pe una che quanno sforgia na mappina

Le serve pe cammisa e dobbrettiello,

Una c'have na facce, arrasso sia,

De mascarone de la Sellaria!

«Na mano raspolente commo a striglia

Tanto sta 'ncozzecuta e strazïata,

Pelosa 'n fronte e spennate le ciglia,

La varva commo a mafaro 'ncrespata;

Lo naso ch'esce 'n fora quattro miglia,

Na chiaveca è la vocca speccecata:

Ma se Micco co me ne fa baratto

Essa è la bella e gaude, io brutta e schiatto!

«Guarda de chi s'è iuto a 'nnammorare!

Fuorze de chella facce affommecata

Che tanto cchiù la vide giallïare

Quanto cchiù mette russo ed argentata?

Ogne zizza è pallone da iocare,

Lo pietto no' l'annetta na colata,

E lo ventre è cchiù tuosto de na preta,

Se vaie cchiù sotta nce ascie na mofeta».

Ed accossì cchiù iuorne, pe sfocare

La raggia c'have, chiagne e tataneia,

E Micco attenne sempre a cammenare

Ped arrivare all'Aquila, e grelleia.

Ma quanno vace lo Sole a natare

Vede da luongo n'ommo che carreia

Certa lotamma co na ciucciarella,

E portava cod isso na zitella.

La quale, o ch'a Grannizia assemmegliasse,

O nce la pense tale lo golìo,

Le parette essa, e fece che restasse

Ammore, senza dire a nullo “a Dio”.

E bisto che l'ha, sùbeto li passe

Movette, e disse sempre: «O bene mio!

Eie essa! Oimé, pe giubelo me caco!

O non vego, o me 'nsonno, o sto 'mbriaco?»

E vace vierzo llà comme allancato;

Ma comme arriva nce perde la rasa,

Che 'nnanze assai che fosse isso arrivato

Chella e lo viecchio trasèro a na casa:

Oh quanto sbruffa e scioscia ad ogne sciato,

Cchiù de na cemmenera e na privasa!

Ca perde la speranza, e pe sciagura

Non sa la strata, ed è la notte scura.

Ad ora ad ora parele vedere

Quarch'ombra che lo piglie, o che sia fatto

Pasto de lupe commo a no sommiere,

Massema mo che stace tunno e chiatto;

Sta dintro no gran guorfo de penziere

E regnoleia commo de marzo gatto,

L'arma soa poco tene, e fa lo cunto

Ch'è cosuta a lo pietto co no punto.

Puro a la fine Ammore lo soccorze:

Quanno manco sperava quarch'aiuto,

Se no ca se ne ieva pe le torze

Dintro lo vosco, affritto e ascievoluto,

Vide no lustro, e vierzo llà ne corze;

Ma chillo, che credease forasciute,

Gridai: «Chi è là? Chi è là? Mamma mia bella!

Uommene armate, oimé, serra e pontella».

Ma decette isso: «Apre, non dubitare,

Ca non so' forasciuto, so' sordato,

E becco mo te dongo pe alloggiare

De moneta de piso no docato».

E tanto sappe dicere e pregare

Che le fo apierto, e steze rïalato:

Ma s'adonai lo scuro a la prim'ora

Ca la zitella n'era la Signora.

Puro, fatto de trippa corazzone,

Se mese co lo viecchio a chiacchiarare

Bello seduto 'ncoppa no saccone,

Po' se nce stese pe s'arreposare;

Ca magnato ched appe no voccone

L'accommenzaie lo viecchio a dommannare

Da dov'è, dove va, quanno è partuto,

E commo a chillo luoco era venuto.

E pe lo filo avennole contato

Da dove vene e dove se ne ieva,

Da tutte che decesse fo pregato

Napole che cosa era e dove steva:

Ed isso se be' schitto era sordato

E nullo libro maie leiuto aveva,

Perché avea na mammoria da stordire,

Decette commo avea già 'ntiso dire:

«Stace Napole mia, bella e gentile,

Sciore de 'Talia e schiecco de lo munno,

Mamma che face nascere l'abrile

Tutto a no ventre sempre co l'autunno,

Sott'a n'airo né gruosso né sottile,

'Nzino a mare commo uovo chino e tunno,

Accanto a sciume e monte e fontanelle

Che 'nnanze foro giuvene e zitelle.

«Pocc'aggio 'ntiso dire la montagna

Che stace a Somma fo no gioveniello

Ditto Vesevo, che pe la campagna

Vedde na Ninfa commo no gioiello:

Chessa lo core e l'arma le rascagna,

Chessa le fa bota' lo cellevriello

De sorte, e d'essa tanto se 'nnammora

Che sospire de fuoco ietta ancora.

«No iuorno le decette: - Non fuire,

Ferma, pe l'arma de li muorte tuoie!

Che gusto haie tu vedereme sperire

Pe cosa che negare non me puoie?

Non voglio cosa c'agge da morire,

Voglio schitto vedere ss'uocchie tuoie

Chisse uocchie belle, ss'uocchie de farcone

C'hanno chest'arma mia posta 'mpresone -.

«Ed essa, sgrata, lo foiette, iusto

Commo fuie da li sbirre contomace,

E se pigliava 'sfazïone e gusto

Che chillo ardesse commo na fornace;

Le refose perzò tanto desgusto

A lo scurisso, che strillanno vace,

E conta a Giove tanta canetate

Che lo fece montagna pe pietate.

«E chillo bello mio sciummo Sebeto,

Patre carnale de li cetatine,

Che bace a mare mo tanto quïeto

Scorrenno a le padule per li rine,

Pe chi pe no tornese taglio e meto

Torza che baleriano tre carrine;

Perché, Napole mio, dica chi voglia,

Non sì Napole cchiù se non haie foglia;

«Isso perzì fo giovene aggarbato,

Che bedette la stessa no tantillo:

Ed a la primma vista fo 'ncappato

Comme sorece 'ncappa a lo mastrillo,

Ed avea cchiù golìo starele a lato

Ca golìo de cerase ha no nonnillo;

Non ce fo taglio: e pe chessa ianara

Tanto cbiagnìjo che deventaie sciomara.

«Ma lo Cielo, che bede e sa lo tutto,

E maie le canetate non comporta,

Perché fa gran peccato ed atto brutto

Chi gusto have vedere gente morta,

'Ntostaie commo a lo core e fece asciutto

Lo cuorpo, aprenno a l'arma soa la porta:

De muodo ch'a Sebeto a mano manca

De na femmena bella è Preta Ianca.

«Non facette accossì chella zitella

Che fo Aretosa la Cecilïana,

Tanto penta, saputa e cianciosella

Che maie fo tale bella 'Merïana:

Che tanto chianze po' la poverella

Che llà becino deventaie fontana,

Perché l'avea lassata lo Segnore

Co ielo e fuoco a l'arma ed a lo core.

«E chillo tanto nobele e famuso

Re de li spasse e de le contentezze,

C'have no pede asciutto e n'autro 'nfuso

E tene la Serena pe le trezze,

Chillo che tanto abbascio quanto suso

E chino de tresore e de ricchezze,

Ha Sannazaro 'nnante a no pontone,

E da dereto chillo gran Marone:

«Posileco, che quanta songo state,

Songo e saranno cose de piacire,

A lo passo de fama have lassate

Tanto dereto che non se pò dire:

Dove vanno a migliara le barcate

Co musice e co buono da 'ngorfire,

Dove sguazzano commo li Marchise

Tutte chille che s'asciano tornise,

«Fo perzì 'nnammorato, e spantecaie

Pe Nìseta, che stace llà becino,

La quale no' lo voze, e s'arrassaie

Comme se fosse stato n'assassino.

Ma chisto e chella po' se trasformaie,

Pe quanto 'ntise da no vettorino:

L'uno è montagna, dov' è tanto spasso,

L'autra no scuoglio che sta poco arrasso».

E dicenno autro tanto de Resina,

E de Massa e de Crapa e de Sorriento,

D'Amarfa, d'Antegnana e Mergoglina,

Vaia e Pezzuolo e Proceta e de ciento:

Uh, ch'a direle tutte è na roina,

E sto chilleto mio sarria spermiento!

Basta: Napole, mamma de Segnure,

E nfra lloro na rosa nfra li sciure.

Quanno 'ntese lo vecchio sto parlare

De maraviglia 'n èstrece era iuto,

Ed averria voluto cchiù spiare,

Ma Micco pe stracquezza era addormuto;

Isso perzì se ieze a 'mmasonare

E dormìjo fi' che Micco fo sosuto,

Parennole dormenno ire pe mare

Vedenno quanto 'ntiso avea contare.

Ma li sordate, che se so' adonate

Ca Micco n'è co lloro chella sera,

Ognuno mille cose ha 'nmagenate

E borriano lassare la bannera;

Ma perché foro li cape avisate

Le fecero chiammare de corzera,

E dissero ca Micco venaria,

Se puro non è muorto, arrasso sia.