CANTO TIERZO

Cienzo se 'nzora e Prezïosa piglia

E se 'ncigna li sfuorge de le feste;

La mamma lo corriero fa a la figlia

E ogne uno de livrera se nce veste,

E de correrese nce se conziglia

Na paparella sotto le fineste:

Correno, vence Cienzo, e a na cantina

Vrociola Ciullo, et ascia Carmosina.

Scùmpela, susso, dimme ss'auto riesto,

Madamma Musa mia, cara e comprita,

Ca se sì fredda te faccio no tiesto:

Perzò me conta commo ìjo la zita

Già Prezïosa a la 'ncorrenno, e priesto

La mamma n'avisaie, Madamma Rita:

Commo essa a l'ora bona è nmaritata,

'Vïammola contenta e conzolata.

La vecchia, che la nova 'ntesa avette,

Pe lo gran prieio s'appe a 'scevolire,

E priesto a li pariente lo decette

Perché a la festa vogliano venire;

Sùbeto no corriero le facette:

O Musa, frate, aiutamello a dire,

Ch'a dire tanta 'nure e compremiente

Se 'nfettaria na nave de pezziente.

Essa acchiettaïe cchiù de na cosella,

Commo a dicere mo no cantariello,

Na caudara, no spito, na tïella,

Na scafareia, na scopa, n'agliariello,

No trèpete, no tiesto, na scotella,

No cato, na porpara e no teniello,

E na cestella po' zeppa fi' 'ncoppa

De cocchiare, conocchie, fusa e stoppa.

L'apparecchiaie dapo' Madamma Lisa,

La sogra de la zita, pe le dare

De tela de Bertagna na cammisa,

No paro de cauzette verde mare

De tarantola, e tre parme de frisa

Co no coscino pe nce lavorare,

E mille marcancegne e scartapelle,

Scarpe, chianielle, scuffie e zagarelle.

Ma Cienzo se 'ncignaïe no vestito

De panno de Gragnano verdevaie,

E ieva alla smargiassa tanto ardito

Che pareva (isce!) non vedisse maie.

Onne uno canoscea ch'era lo zito

E le diceva: «E be', che festa faie?»

Isso decea: «Cose che maie vedisse

Se tu, vossegnoria, me favorisse».

«Io songo, onne uno disse, apparecchiato

Pe te faurire, ca po' vossoria

Me serverite quanno so' 'nzorato»;

Ed accossì na bella compagnia

Appero chillo iuorno conzertato:

Ch'onnuno propio 'n miezo a chella via

Accravaccato a n'aseno venesse,

E na pàpara po' se nce corresse.

Ntratanto Prezïosa non dormette

E fatto s'appe no vagno topiello;

De ferrannina gialla se vestette,

E co lo filo po' marfetaniello

Li pile de la facce se radette,

E co lo solemato e lomenciello,

Verace, armiento, canfora, argentata

Se fece bella a l'uocchie de na fata.

N'antecunnale avea de filonnente

Co no pezzillo 'n ponta a francetella

E no 'ntruglio de vrito pe pennente,

Che 'mponta nce tenea na campanella;

E perché avea cchiù vote puosto mente

A Donna Petronilla Spagnolella,

Essa voze perzì lo manteglino,

Ch'era de cordellato fino fino.

E 'n crosïone, pe no' ve tenere

Pésole, quanno foro 'ngaudïate

Ièzero tutte a tavola a sedere

Dove se foro bone satorate.

A le fenestre po' ièro a vedere

Li corzeture, ch'erano arrevate

Co certe 'mprese ch'erano a modiello

De chelle de Vargaglia e de Rusciello.

La festa se faceva a la Chiazzetta,

Luoco pe chesso propio fatto a posta,

Perch'èie larga, longa, chiana e netta

Che schitto pare fatta pe la iosta.

Onne uno canna apierto l'ora aspetta

E dove sta la papara s'accosta;

Ma chi non voze folla ed appe agresta

S'allogaie <a> na decinco na fenesta.

La primma che venette fu Petella,

Sore carnale de no cacciavino,

Ch'avea na faccie ianca, rossa e bella

Che copèta parea de lo Pennino.

Portava de Gragnano na gonnella

E no ieppone viecchio d'armosino,

Co no corzetto po', co la granniglia,

Che fece a cchiù de quatto auza' le ciglia.

Pimpa po' venne, figlia a la mammana:

Oh mamma mia che uocchie a zennariello!

Na rrobba avea de capisciòla e lana

A la 'ntrellìce, commo terzaniello;

Teneva schitto quanto na campana

Na vozzolella 'n canna e no scartiello.

De lo riesto era tutta saporita

Che n'appe gelosia quase la zita.

Appriesso a chessa Iovannella ionze,

Che se be' aveva n'uocchio scarcagnato

A lo banco tenea cchiù de seie onze,

E cchiù d'uno nce avea l'uocchie appizzato;

E ntra l'autre uno che vennea caionze

Ieva muorto ped essa e spantecato,

E tanto cchiù mo se ne iea 'mbrodetto

Ca portaie na camorra de dobretto.

Con chessa accasïone s'affrontaie

Co Pantullo la figlia de Rinella,

Che non s'erano viste ch'era assaie,

E adesa ne sperea, la poverella:

Co l'uocchie l'uno a l'auto se parlaie,

Ma essa non capea dinto la pella,

E pe darele sùbeto no vaso

L'appe a cacciare n'uocchio co lo naso.

Ch'era tanto la folla de le gente

Che lo vasaie senz'essere veduta,

Ed isso puro potte allegramente

Darele quatto vase a la sfoiuta;

Ma ecco lo scurisso ca se sente

Tutta la vocca de ianchetto 'nchiuta,

Tanto che le fo forza, pe dolore,

Correre a Mastro Paulo 'nciarmatore.

No marïuolo, 'n chesto, co doie deta

A chella folla ne zeppolïaie

Da na vaiassa na vorza de seta,

Che mille scartapelle nce trovaie;

Che se be' dinto no' nce asciaie moneta

Nc'erano robbe da magnare assaie,

Zoè mela, castagne e arravogliata

Na carta straccia de sonzeverata.

Essa se n'adonaie e foro tante

Li strille (terra tienete!) che ciento

Le corzero dereto, pretïante,

Ma chillo se ne ieze commo a viento.

«Para, piglia!», deceano tutte quante.

Para ste brache! Io creo c'avea l'agniento

De le ianare, pocca 'n miezo a chelle

Gente volaie commo s'avesse ascelle.

E fu tanto l'allucco e lo gridare

De ciento porta-robba e peccerille

Che nce voze doie ore pe acquetare

La illaiò, la baia e tanta strille;

Ma dapo' che scompèro de se dare

Spettorune e scianchette cchiù de mille,

Quanno se fo la chiazza arresettata

Li iostrature fecero la 'ntrata.

Lo zito, ch'era lo mantenetore,

S'avea fatta na giubba a la torchesca

De carta straccia, ed era de colore

De fogliamolla còuta fresca fresca;

E no tagliero avea de buono adore

Pe parte de na taraca moresca

Co na cepolla penta, e po' na scritta:

«So' forte cruda, ma so' doce fritta».

Dereto ad isso po' venea Pacione,

Che vestuto s'avea de zegriniello,

E tenea scritto 'ncoppa no pallone:

«Ammore che m'abbotta è sghizzariello».

Veneva appriesso ad isso Menecone

E 'n miezo de no culo de tiniello

Avea na vorza d'oro e seta ianca

Co no mutto spagnuolo: «Non haie blanca».

Po' venne Tonno, che de cordovana

Portava no ieppone ragamato,

E no cauzone de tela bottana

Tutto de filo ruggio repontato;

E portava no pettene de lana

Co chisto mutto: «Ammore m'ha cardato».

E iea 'ncoppa na varda, de manera

Ch'ad onnuno parea vuto de cera.

Dapo' chisso venea tutto vestuto

Mase de cannavaccio 'ncelentrato,

E 'ncoppa no tompagno de liuto

No truocchio co na meza avea pintato;

E no mastro de scola assaie saputo

L'aveva chisto mutto sfrocecato:

«Habere a canto mulïere bella

Sine Cerere e Bacco, frïetella».

Titta venette po', lo cchiù galante,

E fu cierto lo 'nore de la festa,

Perché isso schitto portava li guante

Co li stivale e n'albernuzzo 'n testa.

E fo la 'mpresa soa propio d'amante:

Na vita, na varvetta e na rapesta,

Co la lettera scritta a marzapano:

«Rape-sta vita mia, core de cano!».

Venettero perzì Ciullo, Masillo,

Pizio, Meo, Peppo, Tonno, Cicco, Nato,

Cola, Nardo, Pïone, Lello e Millo,

E lo sciore de Puorto e lo Mercato.

Onne guarzone ed onne peccerillo

Steva pe na corzera apparecchiato,

Ma passïato ch'àppero a lo tuorno

Corze lo zito a suono de no cuorno.

La papara era grossa ed avea ontato

Tutto quanto lo cuollo de sapone,

Perzò lo zito no' nce l'ha sciccato,

Né nesciuno auto de chelle perzone:

Perché da mano a tutte è sciulïato,

Restanno co no parmo de nasone,

E tanto fu la illaiò e l'allucco

Che se sentïjo da Trocchia a Castrocucco.

Lo zito mo decette: «Mazzafranca

Da ccà e da llà, frate, tornammonella

<l>Ca se chesta vranzolla non me manca

Penzo <a> sta botta de sceccarennella».

Ma Ciulio a mano ritta e a mano manca

Tenette mente, e non vedenno chella,

Carmosina, zoè, che sta 'mpresone,

Non fece de la trippa corazone.

Ma co na zirria granne, resoluto

De non campare cchiù, lo poveriello

Chiavaie no bello spruoccolo appontuto

Propio sotta la coda a l'aseniello:

Che manco se no spireto trasuto

Le fosse, arrasso sia, ne lo vodiello,

Tanto corze e zompaie fi' che da duosso

Lo sbalanzaie de pésole a no fuosso.

Ma lassammolo stare a chello bruoco,

Ca la sorte le fu sore carnale,

E tornammo a la fine de lo iuoco,

Ca s'io trico lo zito l'have a male.

Isso commo no furgolo de fuoco

Pigliaie na corza, e de manera tale

A doie mano afferraie la paparella

Che le scippaie lo cuollo e meza 'scella.

Lloco fo no remmore accommenzato

Che lo munno parea ire a ruina:

Li sische t'averriano scervellato,

E duravano fino a la matina

Se non ch'a chesto miezo vrociolato

Se n'era Ciullo dinto la cantina:

Perzò scompìjo la festa e la preiezza

E deventaie sciabbacco l'allegrezza.

Chi a la faccie se fa mille rascagne,

Chi la varva e le zèrvole peleia,

Chi stordisce li vuosche e le campagne

Tanto pe doglia strilla e voceteia,

Chi a pisciariello e chi a selluzzo chiagne,

Tanto ch'onnuno régnola e gualeia,

Tutte credenno mo ca Ciullo è muorto:

Ma isso e Carmosina è quase 'mpuorto.

Pocca 'n chella medesemo cantina

Dove ieze a cadere, stea presone

Chella ch'era lo 'nore de cocina

E l'avea spertosato lo permone.

Ma commo canoscette la meschina

Mentre era tutta tenta de cravone,

E commo 'scèro po' da chello stritto,

Ve lo dico mo mo se state zitto.