Canzon (de l'albuòl)

Brama pur chi se vuol fra armezi d'oro

E sotto rensi e sea

Fotter a so piaser donna lasciva,

Zovene e bella, e brama longamente,

Creda pur fermamente

Che quella sola sia la vera via

Ala qual chi ghe arriva

Retrova del chiavar tutto el tesoro,

Che mi lontan d'humor, così cogion,

Adesso che ho gustà,

Cazzo, cosa è bontà,

No bramo altro mai ch'el magazen

A pe' pian su 'l teren

Sobogìo, sporco e pien d'humidità,

E quel gramo albuòl vecchio apuzà al muro

Cusì in canton al scuro,

E quella dolce e delicà massera

Che fottì al'improviso verso sera.

Coggioni, adesso sì che ho cognossuo

Che più fra le bassezze

Che tra superbie vanità fumose,

L'ànemo e 'l cazzo resta consolao,

Perché de haver provao

Posso ben dir tutte quelle dolcezze

Più care e saorose

Che habbia gustà quanti che ha mai fottuo.

Vaga pur da qua in là in tanta malora

L'haver l'occhio ai pallazzi,

E digo, sotto sora,

Lettiere d'oro, perle e caenoni,

Bei rizzi e zoccoloni,

Bàvari, anelli con spaliere e razzi,

Che no ghe besogna altro per gustar

Che cosa sia el chiavar

Che una potifa monda, schietta e pura,

Giusto come l'ha fatta la natura.

Tutto el resto xe tara, tutto el resto

Si xe intrigo e desturbo

Che strùsia, che travagia e che dà impazzo,

Come pur troppo chiaro e troppo espresso

N'ha mostrà Apollo in esso,

In questo certo sora ogni altro furbo,

Scozzon, astuto e lesto,

Che quando ghe ha tirà sì forte el cazzo

L'è corso come un lovo zorno e notte

Per voler leccar via

Dafne fra boschi e grotte,

Perch'el saveva, no siando ballota,

Che assai più d'una pota

Che no sia sta leccà, toccà o forbìa

Trova dolcezza e giubilo compìo

Ogni cazzo incazzìo,

Che da un mier tutto il dì strussiae

Con forfette, stropagni e aque stillae.

Mille respetti e mille impedimenti

Sempre con essa porta

Donna che viva e che staga ala granda,

Tutti all'attion del fotter dolorosi,

Pessimi diavolosi,

Oro, zògie, damaschi, no comporta

Al cazzo quando el manda

Afflitto e duro al ciel mocoli ardenti.

El so conforto xe co la ghe monta

Haver immediate

Una potiffa pronta,

No in letto fra lascivie e strissarìe,

Ma su un albuòl in pìe,

Dolce sustegno d'un per de culate.

Per queste ogni altra pompa se ghe laga,

E si se ghe ne incaga,

Che tal moza è fra zògie, oro e veluo,

Che xe tutta formaggio, mozzi e bruo.

Che longhe servitù! Che spassizar

Tutto il dì suspiroso e suspettoso!

Che star tutta la notte come lari

A inspiritarse in su le cantonae,

Che per do grame occhiae

Andar i mesi intreghi in su e in zoso,

Che buttar via danari

In ruffiane per farghe parlar,

Che alfin ve manda po tutte in bordello,

Amisi, robba e honor,

La sanità e 'l cervello,

Se senza ste fatture e ste ruine

Con quatro paroline

In s'un albuòl se fotte da signor

Con tanta soavitae e zentilezza,

E con sì gran dolcezza,

Seguri da pericoli e da intrighi,

Da panocchie, caruoli e beccafighi.

O dolce albuòl, o caro magazen,

Assai pi dolce e cara

Massereta zentil, galante e bona,

Perché no sòngio bon da laudarte,

Almanco in qualche parte,

La grazia, la maniera unica e rara

Del to spòrzer de mona,

Che mai pi al mondo ho chiavì cusì ben.

Vardè che qua sia sta quel no volemo,

Orsù via, mo stè in pase,

Che ve penséu che sémo?

Sì, cazzo aponto, caro occhietto mio,

Aldi un po qua da drio.

La vien de longo via senza altre rase,

Ghe dago un baso e ghe digo ribalda,

Et essa sì sta salda,

Ghe alzo su le tàtare e 'l presento.

La ride, e mi, un pentòn, el cazzo drento.

Ceda l'ambrosia e 'l nettare dei Dei,

E vaga alla lovana

Perché no i zonze al terzo della strada.

Altro che i campi Elisi sì ghe vuol

A superar l'albuòl

Che apportè in tutti do sì dolce mana.

Ala prima cazzada

Ne fu forza criar ohimei, ohimei,

E dar dentro de longo ai morsegoni,

A suzzi, a susti, a basi

E ai più dolci spentoni,

Per farla co se diè subito e presto,

Come porta l'honesto

D'un cazzo e d'una pota in simil casi.

Mo no so miga al fin co no morisse

Alora che ghe disse:

Te lasso, anima mia, no posso pi,

E ella: Ohimei, ohimei, vegno anche mi.

Lasso pensar el resto a chi ha intelletto,

E cussì a passo a passo

Considerar el fotter ben compìo,

E che dolcezza che mi gustì alora,

Finché gh'el cavè fuora

Stracco foffio, sudao, pianziotto e lasso,

No lassando da drio

Che anche el deo borghizase qualche puoco,

Che mi, zonto a sto segno, pi no posso,

È forza che me immuta

Con dir che me cognosso

Che 'l mondo possa dar massa lichetti,

Cieli, stelle, pianetti,

Perché senza un pensier, quasi alla muta,

Senza servir, se puol star su le sanze,

Cerimonie e creanze,

Con quatro basi e do – raìze mia –

Provar del fotter l'alta monarchia.

Canzon, porta da lai co ti va in volta

Sempre un bon pistolese,

E per ogni paese

Vattene via resolta

De pettarlo intraverso del mustazzo

A chi te lezze e no ghe tira el cazzo.