Canzon (della masseretta)

Tra quante frezze, cazzo, che ti ha tratto,

Amor, daspuò ti è amor,

No solamente in homeni, ma in dei,

Ardisso dir che ti non ha mai fatto

Colpo de mazor gloria e de pi honor

De questo del mio cuor,

Se ben che zorno e notte sbràgio, hoimei!

Fu il colpo al'improvisa

De sotto la camisa,

Pensando, mi cogion, d'esser seguro,

Quando sora pensier certe occhizae

Me devi regalae

Che da spavento me fè restar duro.

Giera alabastro puro

L'una e l'altra tettina

Che spontava dal vello tutte fuora,

Onde è forza che muora

Se no fùrego un puoco in la monina.

Potta, ti ha il gran poder fra le brigae,

Orbetto fantolin.

Coggioni, adesso sì che me cognosso

Che per ti porto sporche le palae,

E che sempre co fa un saltamartin

Sta dretto el mio puttin

Co 'l viso insbuferlao, pianziotto e rosso;

No provo pi contento,

Anzi ho sempre tormento,

Corro e son con la mente e co 'l pensier

Al mio ben, masseretta del piovan,

Che me ha con le so man

Sola e in camisa fatto presonier,

Che no me valse haver

El stocco desfodrao

Contra la forza de tanta bellezza,

No vardando la frezza

A darme l'astia fina sul sagrao.

O venturà massera, o masseretta,

Deventà mia madonna,

Che me puol comandar sempre d'ogni hora,

Caro el mio caro ben, la mia donetta,

No vùstu darme un dì tantin de monna,

Zo ch'el mio cazzo sonna

Do botte campanò 'nanzi ch'el muora?

Te prego esser contenta,

No voler pi che stenta,

Perché talmente ho in òrdene l'ordegno,

Che se no ti me tiol sta frenesia,

Un zorno per la via,

Cazzo, porìa buttartela de segno.

E tuì questo per pegno,

S'ti vuol saver co stago,

Che ala fin per haver comoditae

De darte do chiavae

Comodamente, son per farme zago.

Ti servi, masseretta, e sti xe degna

Che ogni homo te sia servo,

A star in ditto de chi n'è coggion,

E amor in sta passion sezon me tegna

Se co te vedo no son tutto nervo,

Gagiardo co xe un cervo,

E tutto questo, cazzo, in conclusion.

O pianetto sassin,

Pùstu haver presto fin,

Za che ti ha destinà sta robba arente

D'un vecchio che ha el verzotto in pe' de pinca,

E mi ch'el me deschinca

Tanto el me tira, e no poder far niente!

Ho el cazzo sì sbogiente,

Che se le spesse botte

Come ch'el fa, meschin, no 'l lagremesse,

L'arderìa le braghesse,

E 'l cullo e 'l pettenecchio e le ballotte.

Ti ridevi, cagnona pattarina,

E mi gramo buttava

Làgreme tanto grosse sotto el pano,

Campo alto al cullo lu e la so puìna!

E mi co la capella suspirava,

Pénsete se provava

Ogni compìa malora, ogni malano.

Te vardava e taseva,

E co 'l cuor te diseva:

Mo se quel che ti mostri xe sì bello,

Che cosa diè esser sotto la vestura,

In quella stendaura

Che monna gusteràvio con l'osello!

In fina ogni cavello

Se me drizzè del cao

Quando te visti do gambe sì fatte,

E quasi me insì el fiao

Pensando a quel che diè esser le cullatte.

Del servir che ti fa no te instizar,

Perché aponto el pi bon

Che nasce sotto el ciel xe destinà,

Speranzetta mia d'oro, e sconvien far

A quel la servitù e condition

Che obliga el so paron,

Ordene che xe stao, che xe e sarà.

Varda l'oro e l'arzento,

Che è pare del contento,

Comodo tutto do serve ala stretta

E ogni altra cosa in anema e vivente.

Benedette le stente

Che ti fa in ca' del vecchio, cusì quieta,

Che tanto me deletta

E me piase i to muodi

Che basserave i scòvoli e le scuelle,

Piàdene e pignattelle,

E infina anche la secchia che ti svuodi.

Amor te diga là che notte fe',

Che fu sempre presente

A quelle smanie, a quei grossi suori,

Che un gramo puoco che me indormenzè,

E che me insuniava esserte arente

Co 'l cazzo reverente

Te comenzava a penetrar i ori,

Fu sora del mio letto

Da un gatto maledetto

Desmissià co un'urla spaventosa,

E mi, pensando d'esser sentà in sella,

Me trovì in man la mella

Infin ai elci tutta smocignosa.

O che stella rabbiosa,

O pianetto fottuo,

Za che co penso d'esser a le strette,

Me trovo le borsette,

La man, la panza, el cazzo tutto bruo.

No credo certo che sora la terra

Sia un altro inamorao

Che mena vita sì dura e senestra

Come che meno mi mattina e sera,

Masseretta, daspuò che mi t'ho occhiao.

Cancaro a chi ha insegnao

Senza pignata far tanta manestra,

Ma sia pur i disgusti

E le làgreme e i susti

Quanti che i vuole, e sia grandi i tormenti,

Che sarò sempre el pi constante osello

Che viva sotto el cielo,

No menando mai l'ale in altri venti.

Con ti xe i mie franzenti,

E con ti me ne impazzo,

Né con altre sto cazzo mollerò

Per fina che haverò

Spirito, vita cuor, ballotte e cazzo.

Canzon, scappina via da la massera

Inanzi che sia sera,

E dighe in t'una recchia sora el tutto

Che morirò se la no me dà agiuto.

Ma varda a dirlo pian

Per amor del piovan,

E che co la t'ha letto

Che la se sconda sotto del so letto,

E se per strada qualcun te trovasse

E che 'l te coggionasse,

Senza cercar ch'il sia

Dighe bardassa vecchia e corri via.