Canzon (delle strazze)

Amor, vivemo tra la gatta e i stizzi

In t'una ca' a pè pian,

E no vedo però che ti t'aggrizzi,

Dove e la lume e 'l pan

Sta tutto in t'un, la rocca, i drappi e 'l vin,

La vecchia e le fassine,

I putti e le galline,

E mezzo el cavezal sotto el camin,

Dove taccà a un ancin

Ghè in muodo de trofeo

La farsora, una scuffia e la graella,

La zucca da l'aséo,

Un cesto e la sportella,

E 'l letto è fatto d'àlega e de stoppa,

Così avalìo che i pùlesi s'intoppa.

In pe' d'un papagà s'alieva un'occa,

In pe' d'un cagnoletto

Gh'è un porchetto zentil che basa in bocca,

Lascivo animaletto,

Soave compagnia, dolce concerto,

L'occa, la gatta e tutti,

La vecchia, el porco e i putti,

Le galline e 'l mio amor sotto un coverto,

Ch'è in cento parte averto,

Onde la luna, el sol,

Fa tanto più la casa allegra e chiara,

Come sotto un storuol

Sconde fortuna avara

Una zògia, una perla in le scovazze,

Infinita bellezza in mille strazze.

El cóncolo del pan stroppa un balcon

Che n'ha scuri né vieri,

Magna in tel pugno ogn'un co fa el falcon

Senza tola o tagieri,

Sta la famegia intorno alla pignata

A aspettar che sia cotto,

Ogn'un beve in t'un gotto,

E tutti sguazza a un bezzo de salata,

Vita vera e beata,

Un lenzuol fa per sìe,

Che da un dì all'altro è marizzà dal fumo,

Man, brazzi, teste e pìe

Sta in t'un, tutti in t'un grumo,

Onde se vede un ordine a grotesche

De persone, de bestie e de baltresche.

In casa, chi xe in camera xe in sala,

Chi è in sala è in magazen,

Gh'è nome un letto in t'una sottoscala,

Ove in brazzo al mio ben

Passo le notte de dolcezza piene,

Se ben la piozza e 'l vento

Ne vien tal volta drento

A refrescar l'amor su per le rene.

Notte care e serene,

Caro luogo amoroso,

Beltà celeste in povera schiavina.

Tògia un letto pomposo

Ch'ha dentro una Gabrina,

Che fa in lu quell'effetto un viso d'orca,

Che in bella chebba una gazzuola sporca.

In sta ca' benedetta e luminosa

Vive poveramente

Sta mia bella d'amor cara e strazzosa,

Strazzosa riccamente,

Che con più strazze e manco drappi intorno

Più se descovre i bianchi

E verzelai fianchi,

Com'è più bel con manco nìole el zorno,

Habito troppo adorno

Sora perle e rubini,

Sora beltà che supera ciascuna.

Qual se fra do camini

S'imbavara la luna,

Che luse in mezzo, tal splende la fazza

E i razzi de custìa fra strazza e strazza.

A sta beltà ste strazze ghe bisogna,

Che no se diè stroparla,

S'ha da covrir de drappi una carogna

Che stòmega a vardarla,

Ma quella vita in st'habito risplende,

Senza industria e senz'arte,

Masizza in ogni parte,

Che né cassi, né veli il bel contende.

Carne bianche e stupende,

Al ciel nude e scoverte

Per pompa de natura poverette,

Andé a sto muodo averte,

O collo, o spalle, o tette,

Che no se tàgia un vanto ove è l'anello,

Se no, perché è pi bel questo de quello.

Che drappi porìa mai, se i fosse d'oro,

Covrir sì bei colori,

Che no fosse un leame in su un tesoro,

Un fango sora i fiori?

Va pur cusì, che l' humiltà t'innalza,

Va, poveretta altiera,

Cusì co i pìe per terra,

Che ti è pi bella quanto pi descalza.

Com'el ciel me strabalza

A una bellezza estrema,

In t'una casa che no gh'è do scuelle,

Providenza suprema

Del cielo e delle stelle,

Che xe andà a cattar fuora do despersi

Per unir le to strazze co i mie versi!

Strazze mie care, ond'ho rivolto el cuor,

Dolce strazze amorose,

Fenestre della gratia, occhi d'amor,

Strazze fodrae de ruose,

Che se vede a spontar tra lista e lista,

Fuora de quei sbregoni

Quattro dea de galloni

Che trazze lampi che te tiol la vista.

Fia mia, chi no t'ha vista,

È un huomo mezzo vivo,

Chi te vede e no muor è un zocco morto,

E mi che te descrivo

So che te fazzo torto,

Che te tanso la gloria e te defraudo

E te stronzo l'honor pi che te laudo.

Podess'io pur con dar della mia vita

Trovar più lengue a usura,

Che la mia sola a una beltà infinita

È piccola misura,

So che no digo niente a quel che lasso,

Ma quel puoco ch'intendo

El mesuro, e comprendo

Co' se mesura el ciel con un compasso.

In sta bellezza passo

La mia vita contenta,

Che trova salda fede in veste rotte,

No ho pi chi me tormenta

Né 'l zorno, né la notte,

Ghe xe un voler, un'anima in do petti,

Così che ghe n'è puoche in molti letti.

Cerché, donne, d'haver laghi de pianti,

Rèfoli de sospiri,

E sempre innanti eserciti d'amanti,

Formé nuovi martiri,

Notrive cento diavoli in te i occhi

Che tenta i cuor contriti,

Cerché che mille afflitti

Ve se vegna a buttar morti in zenocchi.

Amor, s'ti me infenocchi

Mai più, frìzzeme all'hora,

Che te apparecchio la farina e l'ògio.

Questa è la mia signora,

La me vuol, mi la vògio,

Non ho qua da rabbiar, né da instizzarme,

Chi vuol guerra d'amor se metta in arme.

Canzon mia repezzà,

S'ti è per sorte represa, e ti reprendi

Chi te reprenderà,

Mostra che ti l'intendi,

E di', che s'ti no ha drappi de veluo,

Che quel che è Dio d'Amor va sempre nuo.