PRIMMO

Parla co Cicco e Cola Sarchiapone

E co ll'aute compagne fa conziglio

De fa' no gruosso e gagliardo squatrone

Pe ghire a conquistare lo Cerriglio.

Chesto vene 'n sentore a lo patrone,

Ca pe tutto se sente lo vesbiglio:

Ne n'attemo n'esèrzeto fa fare

Pe bole' a Sarchiapone arroienare.

Io canto chelle forze e chelle prove

Che fecero ciert'uommene valiente

Cchiù d'Orlanno, cchiù d'Ercole e de Giove,

Anze a paro de chiste non so' niente:

E dico ancora comme fuieno nove

Chiste, e se steano a spizzola' li diente,

E feceno ntra lloro no consiglio

De ire a conquistare lo Cerriglio.

Ehi, Muse, vuie che soletarie state

'Ncoppa a sso monte, e maie no' ve partite,

Ve suppreco ch'a bevere me date

Comm'all'aute assetate vuie solite:

Ca non so' nuovo a chessa 'nfermetate

De poetare. Perzò vuie decite

Mentre ch'io scrivo 'ncoppa a no vreccione

Vierze pe 'mmortalare a Sarchiapone.

Massema mo, ch'ascire da Levante

Vedite Apollo co lo carrettone,

Che cantare pe forza è abbesognante,

Ca po', si none, ve mette 'mpresone;

Ed io m'assetto 'ncoppa a ss'erve 'nnante

Ch'accommenza a sona' lo calascione,

Pe dareve chist'auto mio tributo

De sto poemma, vero e non fegnuto.

Era, comme ve dico, Sarchiapone

Auciello d'acqua, ma lo cchiù balente

A sonare l'arciulo e lo tremmone

De quanta fùino a Napole azzellente;

Ommo che despotaie co Ferrantone,

Masto de scola, e llà tutte le gente

Stevano a canna aperta a lo contrasto,

E ghiodecaino ca perdìje lo masto.

L'aut'era Rienzo porzì baloruso,

Ommo de 'nciegno e de gran fondamiento,

Che quann'era picciotto a lo Pertuso

Ne volev'isso sulo cchiù de ciento;

L'aut'era appriesso lo Dotto' Vavuso,

Ch'a correre faceva co lo viento,

Ed era bello, museco e galante,

Famuso, vertuluso, e porzì amante.

Masillo è pone, cchiù de chillo Chiotta

Che fu mastrone de lo gran sbaratto;

Chisto, se la menestra è cruda o cotta,

Se la gliotte co tutto lo pïatto:

E bì ca vide maie ca s'abbotta,

O ca lo ventre suio se fa chiatto!

'Nfine ha lo cannarone tanto gruosso

Che se gliotte la carne e perzì l'uosso.

L'auto se chiamma lo gra' Menechiello,

Che sempre vace armato de cortelle;

Chisto sa cchiù de Micco de doviello

Ed è muto valente a le panelle:

Cierto ca se lo granne cellevriello

Mostrasse, porria vencere le 'scelle

Che fece chillo co tanto artefizio

Ch'a mmaro po' cadette 'n prezepizio.

Peppo l'auto se chiamma, ed ha no naso

Ch'è fatto a muodo de no catenaccio:

Chisto soleva i' spisso a Parnaso

A fruscia' Febo e da' a le Muse 'mpaccio:

Vasta, ca corre ancora nfi' a l'Occaso

L'addore de na fella de migliaccio

Che no iuorno, passanno pe lo Muolo,

Se la gliottìje sotto a lo ferraiuolo.

Sèqueta Cicco de casa Fragnola,

Ch'a fragnere fragnea cchiù de molino,

Ed avea 'mbocca na valente mola

Che steva sempre lesta a lo cammino;

L'auto è chiammato lo poeta Cola,

Che leiea chillo de casa Marino:

Ommo de ciappa e de 'norata famma,

Chisto, tra l'aute, era de franca lamma.

E l'utemo era Iacovo valente

Che fece mille prove a lo Mercato,

Che da tutta la frotta de la gente

Iacovone pe nomme era chiammato.

Musa, te prego, famme veni' a mente

Le forze de chist'ommo assai 'norato

Azzò io manna co famuso stile

Le balentizie soie da Vattro a Tile.

Era lo tiempo che Febo sfrattava

Pe la paura de lo Scorpïone,

E priesto all'auta casa s'accostava

Pe no' llevare quacche mozzecone:

Quanno la Famma lo pietto abbrusciava

De lo famuso aroie Sarchiapone

De fare nove 'mprese e ghire arrante

E de manna' la casa soa nnenante.

E mentre stea pensando sulo sulo

Comme potesse accommenza' la guerra,

L'armo cresceva cchiù de no cetrulo

Quann'è adacquata bona chella terra:

Vecco venire a cavallo a no mulo

Cicco co Cola 'n groppa da la Cerra,

Cicco co li stivale, e a li tallune

Cola tenea legate li sperune.

Quanno Sarchia vedette Cicco e Cola

Ora pensalo tu ch'armo facette:

Haie visto maie quanno da la gaiola

L'auciello sbigna ed a fui' se mette,

O quanno lo scolaro da la scola

Esce, che d'allegrezza le cauzette

S'enchie perzì? Cossì s'allegra e pare

Che sia de l'allegrezza lo compare.

Po' disse: «O bemmenute!» — «O ben trovate!»,

Responnettero lloro, e scravaccaro

E 'nzembra tutte tre fùino assettate,

De lo cchiù e de lo manco po' parlaro.

Po' disse Sarchia: «O uommene 'norate,

Ca comm'a buie non aggio nullo paro,

Ve voglio di' la 'ntenzïone mia

Azzò vuie me mettite pe la via.

«Io creo ca vuie sapite muto buono,

Pe chillo tiempo che me canoscite,

Si so' de lo Mercato e Puorto truono

E si maneio buono spate e spite,

E si la Famma sempre co lo suono

Verveseia de me: perzò unite

Ve preo che state tutte quante 'n chietta

Pe fare de Cerriglio gra' mmennetta.

«Pocca chisto nce ha fatto sempe guerra,

E nc'è stato nemmico capetale:

Nuie lo volimmo manna' 'n chiana terra,

O veramente a mori' a lo 'spitale.

Ognuno priesto ad ammola' la sferra

Se dia, pe fare gran fracasso e male,

E chiammarite a la 'ncorrenno e priesto

De li compagne tutto l'auto riesto.

«Chiammate Peppo e chiammate Masillo,

Chiammate Micco, Rienzo e lo Dottore

E Iacovo perzì, ca n'è berrillo,

Ma è ommo tutto chino de valore.

De nuie nesciuno è quacche peccerillo,

Ca simmo la sostanzïa e lo sciore:

Zoè, comm'è lo grasso a lo pignato,

Cossì nuie simmo mo de lo Mercato.

«E 'n crosïone ognuno craie matino

S'aggia ad asciare co la spata a llato

O a la Sellaria o a lo Pennino,

Dapo' ch'avite ogne compagno asciato:

Perché avimmo da essere vecino

A lo Cerriglio 'nnante che schiarato

Se sia lo iuorno, e llà starrimmo 'n tresca,

E nce 'nchiarimmo buono la ventresca».

Ognuno alliegro e co lo riso 'nmocca

Decette: «O bene mio, buono haie penzato,

Ca nce volimmo 'nchi', mo che nce tocca,

De le robbe de chisto sbreognato.

Sta notte non sia nullo che se cocca,

Ma sempre stenga pesole e scetato,

Penzanno che sia priesto la matina

Pe fa' fracasso, strùppeio e roina».

Ma già se ne veneva da le grotte

De li zingare tinte de craune

Adaso adaso la madamma notte,

Pe fa' scurare tutte li cantune;

E Febo consegnava bone zotte

A li cavalle co li capezzune,

Perché le facea suonno, e bolea ire

Co la moglie d'Ocëano a dormire.

Lloro l'ammice iettero trovanno

Pe tutte li cafuorchie de le chiazze,

Che parea che ghiettassero lo banno,

Ed erano tornate quase pazze:

Chi iea sagliendo e chi iea tozzolanno,

Ch'appero ad abbuscare bone mazze;

Ma po' che tutte quante appero asciato

Tutto lo fatto l'appero contato.

Ma lasso sto negozïo contare

A Cola, ch'era buono parlatore,

Ed abbesogna a Sarchia mo tornare,

Che stea contanno tutte quante l'ore:

Non se voleva niente appapagnare

Perché avea famma d'acquistare 'nore,

Ma puro messè Pavolo venette,

E lo mantiello 'n capo le spannette.

Ma non pe chesto lo suonno poteva

Co l'acqua de lo frate fa' scordare

A Sarchia chello che pensato aveva,

Zoè de lo Cerriglio conquistare:

E mente chello poco s'addormeva

Pe la cocozza se sentea 'ntronare

Na voce, comme 'scesse da no cuorno,

E dicea: «Suse Sarchia, vì ch'è ghiuorno».

Isso che 'ntese chesto se sbegliaie

Co no gra' schianto e miezo sorreiuto,

E da valente sùbeto s'auzaie

Pe bede' s'era llà quacche paputo.

A la fenestra priesto s'affacciaie,

Ma lo munno a chell'ora era ammotuto,

Sulo 'n cielo Febea steva affacciata

E da mille zitelle 'ntornïata:

Febea, ch'era 'sciuta a fa' la spia,

Se nc'era quacarcuno pe le serve,

Azzò non fosse vista pe la via

Mente scenneva e ghiea 'n miezo a le berve,

Perché bolea sgana' la fantasia

Con chillo che dormeva 'ncoppa a ll'erve,

E pe paura de lo suo patrone

Se pigliava annascuso 'sfazïone.

Vedenno chella facce tonna e ghianca

Che parea no sciaudone 'nzuccarato,

Le venne cchiù che non avea l'allanca,

E priesto se vestìje e s'appe armato;

A lato se mettìje na lamma franca,

Che poco 'nnante n'avea smafarato

No gatto gruosso e grasso sorïano,

E lo pummo era a milo tramontano.

Po' scese a chiazza e steva passïanno

Comm'a chillo che fa la sentenella,

E dicea: «Quanno se fa ghiuorno, quanno,

Pe da' a Cerriglio la gran cacarella?»

Ntratanto ieva Cinzïa scuranno

Lo cielo, e commegliava ogn'auta stella

Co no panno de lutto, azzò l'Aurora

Lo ianchïasse a llà n'auta mez'ora.

Quanno isso s'abbïaie chiano chiano

'Nmiero lo largo de la Sellaria

E co la spata sfodarata 'n mano

La iea sfruscianno ad ogne crocevia;

Iea accappucciato co no malantrano

Che balea iusto poco cchiù de cria,

E tenea li stivale de vacchetta,

Le cauze a brache co na gran vrachetta.

Ionze a lo luoco de l'appontamiento

E trovaie tutte quante a no pontone;

Uno 'n mano tenea na ntorcia a biento

E scoprìje da lontano a Sarchiapone:

«O ben menuto, lustro cchiù d'argiento,

Disseno, nuostro capo e campïone».

Rispos'isso: «Sïate ben trovate

Ammice fedelisseme e 'norate».

Po' mute zeremmonïe facèro

'Nzembra, conforme fanno li Signure,

E 'nmiero de lo ponte s'abbièro

Pe s'allogare le cravaccature.

Ma pe direve, mo, lo bello vero,

Mente ieano pe chelle chiazze scure

Retomano le iea no guarzonciello

Che ghiea a pigliare carne a lo vordiello.

Chisto stea co Cerriglio ed ascotaie

Quanto disseno lloro pe la via,

E comm'appe sentuto se lassaie

Volanno, pe porta' la nova ria;

Ionze priesto a la porta e tozzolaie:

«Chi è là?», disse uno che facea la spia;

«E Ciommetiello, disse lo guarzone,

Apere, priesto, àpere patrone.

«Priesto, ca simmo tutte arroienate!

Armateve e mettiteve no giacco,

Ca mo sarrà sto Regno assedïato

Ed averrà da cierte no gra smacco».

Cerriglio, mo, che stea miezo malato

E 'n gamme se sentea no poco fiacco,

De paura le vennero le ghiute

E tutte li cauzune s'appe 'nchiute.

Po' disse: «Viene ccà, che cosa dice?

Chi so' chiste che ccà vonno venire?»

Isso respose: «So' cierte nemmice

Che bonno fare a nuie tutte morire.

L'aggio sentuto io, che chiste ammice

Ntra lloro ste parole steano a dire:

— Iammo mo, priesto, iammo a cravaccare

E de Cerriglio lo Regno assautare —».

«O sfortunato me», lo Re dicette,

Ch'era Cerriglio, Re de chella terra:

E tanno mute lettere scrivette

A ciert'ammice pratteche de guerra;

Spedìje na manïata de staffette

Ed avisaie Ognuno che se 'nzerra,

E po' stìjano sbegliante a la defesa,

Pe fare a sti nemmice grann'affesa.

La primma ieva a Cicco Coceniello,

Chillo che fatto fu Mastro de Campo,

E sapea ch'era no gran cellevriello,

E dea primmo lo truono che lo lampo;

La seconna iea appriesso a Masaniello,

Che stea allancato cchiù che n'è Melampo;

L'auta iea a Capitanio Cesarone

Ch'avea na cera de no gran barone.

E mente ognuno priesto s'allesteva

Pe preparare chesta gran battaglia,

Cerriglio lo paese revedeva

E dea denare a chi n'avea na maglia;

Le sentinelle ad ogne nparte aveva

Mese, ped aspetta' chella canaglia:

Ma comme s'accostaino pe l'assauto,

Mo mo ve lo dirraggio con chist'auto.