QUARTO

Ma quanno l'Arba, pocca l'ha ammorbato

Titone, esce a lo frisco a sciaurïare,

Ed a le stelle è fatto lo mannato,

Comm'a frostiero, c 'àggiano a sfrattare,

Se sose Apollo, e commo stennecchiato

Se fu no poco, fécese cauzare

Da dudece provécete zitelle,

Che lo vesteno e spogliano, assaie belle.

Commo s'appe vestuto e fatto nietto

E capo e diente ed ógne e mano e facce,

Se reteraie pe n'ora a no retretto

Dove sòle spedire assaie despacce;

Pe fa' 'sarzizio, po', a no ciardinetto

De giesommine e sciure de vorracce

Scese, e nuie tutte appriesso 'n compagnia

Iammo, e dapo' a na bella gallaria.

A chella stessa che deciette 'nnante,

Dove so' tanta quatre e statoe belle:

O bene mio, e chi ne dice tante?

'Nnante se contarria tutte le stelle!

Lassammo li cravunchie e li diamante

E l'autre gioie ed isce autre coselle:

Dirraggio sulo, se la mente dura,

Cose da fa' stopire la natura.

Io co no parmo apierto de ssa canna

Iea 'ntuorno, ammisso, a tanta cose e tale;

S'addona Febo, e chiammase da banna

(Ch'era vecino llà) lo Caporale,

E dice: «Se la vista non me 'nganna

Chisto ha no gran golìo sapere quale

Cose ccà 'ntuorno 'ntuorno stanno appese:

Dechiarancélle, e sìnghele cortese».

Sùbbeto me mostraie a mano manca

Na strenga, tutta rotta e annodecata,

Che 'nnante 'ncarnatina, e po' fu ghianca,

Da C. Q. gran tiempo portata;

E dove miezo spùngolo nce manca

Se nce vede na scritta 'mpeccecata

Che dice: « Ammaro chi non vace 'n chiummo,

Pocca è meglio l'arrusto ca lo fummo».

Appriesso è lo tezzone ch'Erostràto

Allummaie quando deze fuoco a chillo

Tempio cossì famuso e nnommenato,

P'avere famma cchiù de Mastro Grillo;

No 'petaffio llà sotta nc'è 'ncollato,

Ch'ogne lettera è quanto no mastrillo:

« D'ogne muodo s'acquista famma e loda,

Chi non have la carne aggia la vroda».

De Demmocreto po nc'è lo vrachiero

Che pe ridere tanto e non crepare

Tenea 'mbracato: e fu no gran penziero,

Ca tanto riso lo potea schiattare;

Lo mutto decea po': «Sì no sommiero

Si non ride de quanto vide fare».

O filosofo granne, io t'aggio 'ntiso:

Non se fa cosa che non mova a riso.

Accanto appesa nc'è de Mecenato

La vorza, ch'era aperta a li sapute:

O bello tiempo, e commo sì squagliato,

Che cagnave li vierze pe li scute!

Sotta nce avea quarc'ommo letterato

Ste parole a na tavola appennute:

«Studia e scrive che buoie, non ne faie straccio,

Ca chesta ha na fattura a catenaccio».

Appriesso nc'è de seta na gonnella

Che fu de chella nobele pottana

Che quanno devacaie po' la scarzella

Arrecchìjo la Repubreca Romana,

'N pede a la quale è posta na cartella:

«Ped autra strata ogne speranza è bana.

Suda, stenta, fatica e fa' che puoie:

Sulo pe chesta arrive dove vuoie».

Passa, e bide la penna de l'auciello

Che tanto caro fu a lo 'Mparatore,

Schitto perché mostraie buono cellevriello,

Quanno passava, a dire: «A Dio, Signore».

Sotta nce vidde ancora no cartiello

Scritto, lo quale dice a sto tenore:

«Chi le facce lavate non sa fare,

Fuia la corte, e bàgase a 'nfornare».

La votte de Diogene nc'è a lato

Dove godea lo sole ad ogne bierzo,

Sazio d'avere schitto, a chillo stato,

Chello che dà lo sciummo e dà lo cierzo;

No mutto nc'è a lo màfaro 'mpizzato

De bregamino, ch'è no parmo e tierzo:

«A Dio palazze, a Dio grannezze et oro,

E meglio libertà d'ogne tresoro».

Na carrafella po' nc'è chiena chiena

De lo chianto de chillo gran Romano

Che de Pompeo mostraie na grossa pena

Quann'appe già la catarozza 'n mano,

Dove se lèie: «Va' attèrrate a l'arena

Si tu non magne semmola, pacchiano».

Di' ca chessa è boscìa, o munno stuorto,

Tale t'alliscia che te vòle muorto!

Na coda a lato nc'è de no sommiero:

Cosa non fu a lo munno cchiù stopenna!

Ma la lescìa nce perze lo varviero,

Se be' l'oro magnava comm'a brenna:

Deze l'arecchia soa 'n bruodo lardiero

Ad uno c'aggio mo 'mponta la penna,

Tanto che lo votaie dov'appe gusto,

E fece no Frevaro de n'Agusto.

A l'ùtemo, quann'era 'n granne autezza,

Zùffete abbascio: accossì ba lo munno,

Ca quanto cchìù baie 'ncoppa co prestezza

Tanto cchiù priesto vruociole 'n profunno:

Perze la varda e sulo la capezza

Le restaie, ma lo Dio lucente e ghiunno

N'appe la coda, e ccà l'appese e scrisse:

«Penza a la fine». Oh quanto buono disse!

Lo schiecco nc'è de Socrate cchiù abbascio:

Viato chillo che l'avesse 'nnante,

Ca non se tenarria, mentre ch'è n'ascio

Pe no Narciso nobele e galante,

Né pe Signore chi è de quatto a fascio,

Né ped ommo de stima chi è forfante;

Sotta nc'è na sentenzia de Dottore:

«Vìdete spisso, e non puoie fare arrore».

Appriesso steva, tutta arravogliata

De carta straccia primmo e po' de panno,

De no mastro de scola la sparmata,

Che stato a Siracusa era tiranno,

Dove na scritta nc'era appeccecata:

«Songo scettro perzì, perzì commanno,

Si non Regne, na scola de figliule:

E si non taglio cuolle, ammacco cule».

Dall'autra banna, dinto la vammace,

Sta lo modiello de lo Culiseo,

E tanto a Febo st'artefizio piace

Che n'aggia a fare n'autro cierto, creo,

Pocca se trova lesto ogne sequace

De Petrarca, Vergilio, Omero e Orfeo,

De portàrence sopra de la schena

Acqua, prete, savorre, cauce e arena.

Chisto addefizio a tutte non se mosta,

Ma schitto a quacarcuno, pe faore,

Perch'è na cosa fore de la iosta,

Cosa propio de Re, de 'Mparatore;

Na bella scritta d'oro nce sta posta,

Che cierto è cosa d'azzellente autore:

«Ommo 'gnorante, vascia ss'uocchie e squaglia,

Schitto pe studio è fatta st'anticaglia».

Dapo' lo riso nc'era a schiattariello

De na statoa de preta, quanno muorto

Calligola vedette, poveriello,

Che lassaie lo deritto pe lo stuorto;

E la scritta dicea: «Sta' 'n cellevriello,

Non fare a nullo maie vregogna o tuorto,

Ommo potente, ca si po' sì acciso

Fi' a le prete se schiattano de riso».

Cchiù appriesso no fïasco de cristallo

Zippo de chelle lagreme ch'a lava,

Coll'uocchie, chillo buono e gran cavallo,

Mastro d'ammorosanza, devacava,

Quanno iocaie co Morte e fece fallo

Caio, da chi n'avea sempe la biava;

E na scritta diceva: «Ora 'mmezzàte

Vuie ch'a chi ve fa bene site sgrate».

Lo cortiello è cchiù 'nnante co lo quale

Logrezia se sperciaie lo manco lato,

Quanno chillo Soperbio e bestïale

Le mese tanta carne a lo pignato;

Sotta è no mutto: «Chesso niente vale,

'Nnante de vive avérence penzato!

Spilata è Patria: ca te strippe e scanne,

E tardo lo remmedio a tanta danne».

Lo crivo è appriesso dove sana sana

L'acqua Tuccia portaie, pe confermare

Ca n'avea poste balle a la Doana

E n'era iuta ancora a bennegnare;

Decea lo scritto, che lo sienzo schiana:

«Oie si tu tuorne ciento vote a mare

E puorte crive no, ma utre e butte,

Sempe le portarraie vacante tutte».

Appriesso nce sta puosto lo cravone

Che Porzia se gliottìje bello allummato

Quann'avette a l'arecchie lo vespone

C'aveano lo marito sbennegnato:

O fosse ca perdìje lo sauciccione,

O fosse pe l'ammore sbisciolato:

La scritta dicea po', de carta penta:

«De chesse se n'è perza la semmenta».

Ma chi porria contare ad una ad una

Tanta cose stopènne e stravacante,

Se quant'uommene so' sotta la luna

Parlassero co lengue de diamante?

A me la mmaraveglia era na funa

Che me tirava quanto cchiù iea 'nnante,

E me ne iea vedenno fi' a la sera

Se de magnare tiempo mo non era.

Ecco ca «tutt'a tavola» te siente

Na trommetta sonare: ognuno corre

Commo la varca c'ha 'mpoppa li viente,

Bona 'nsivata, che bolanno scorre;

Io puro, ch'ammolato avea li diente,

E dato avarria a muorzo a le savorre,

Appriesso a Febo me pigliaie la strata,

Dove la tavol'era apparecchiata.

Febo magnaie da dinto e nuie de fore,

'N commerzïone coll'autre sapute,

E 'ntanto se facea no gran remmore

D'arpe, de lire, cetole e lïute.

Nc'era tanno arrivato no Dottore

Che la pazzia le fa trovare scute:

E commo fu 'nnante ad Apollo, schitto

Isso dicette, ogn'autro stette zitto.

«Signore, de vertù sauda pontella,

Spireto de le cose, vita e lumme

Pe chi la terra se fa lustra e bella,

Pe chi fanno mmiracole li sciumme,

Pe chi lo tiempo va senza stanfelle,

Pe chi arde ogne stella che tu allumme,

Da lo gran nomme tuo tanto 'norato

So' stato comm'a n'argano tirato.

«Non me sprezzare, ca se be' la gente

Crede ch'a sta cocozza non sia sale,

Se gabba, ca ped arte assaie saccente

Me 'nfengo 'nsallanuto e bestïale;

Perché bedenno ch'all'aità presente

Lo studio de le lettere non vale,

Co na 'nnustria m'abbusco tanto 'n terra

Che la necessetà non me fa guerra.

«Si no' lo cride damme no tornese

Ca te sbotto mo propio no concietto,

E bedarraie se lo Dotto' Chiaiese

Pò co ss'autre legiste stare appietto».

A chesso Apollo a ridere se mese,

Mostranno de n'avere gran delietto,

E disse: «Te do mo no tallarone

Se sso concietto me dà 'sfazïone».

«So' contento», diss'isso; e Apollo tanno:

«Di', che bò dire mo ca la saietta

Maie da fore la votte fece danno,

E lo vino de dinto sorchia e annetta?»

«Gran dubbio è chisto, che ben aggia aguanno,

Disse Chiaiese, mo lo scioglio, aspetta:

Siente, ch'a primmo dóngonce de cuorpo,

Ca la meteora m'è nasciuta 'n cuorpo.

«Lo sole co lo caudo de li raie

Tira 'ncoppa li chille de la terra,

E po' se fanno dov'è friddo assaie

Cchiù tuoste de le prete de la terra;

Siente: lo caudo fece sempe maie

Co cose fredde costïune e guerra,

E pe l'anteparìstase la 'state

So' l'acque de li puzze cchiù ghielate.

«Ma quanno po' lo terramoto vene

(Chisto concetto vale quattociento)

E ca la terra dinto de le bene

Tene gran flato che le dà trommiento,

E perché non c'è miedeco che tene

Natura fa' sta crise, esce lo viento;

Ma se sta scritto buono a lo quatierno

Fa cchiù caudo la 'stata che lo vierno.

«Ora, tornanno arreto, io trovo scritto

Ca la saietta <è> de materia crassa

Perché non sa passare pe lo stritto:

Zzò che trova e la 'ntoppa, rompe e scassa;

Chella, ch'è tenoe <e> pe no poro schitto

Comm'aco lancianese percia e passa,

Chi lo dice non have cellevriello:

Nego atque nego et àccipe cappiello.

«Mo te trovo lo capo, ca sto chino

De gran conciette, cchiù d'autra iornata:

La saietta, ch'ha fatto assaie cammino,

Vene cauda e de sete sta allancata:

Trova la votte, ch'è chiena de vino,

E se la veve tutta a na sorchiata.

Vuoie tu che fosse tanto bestïale

Ch'a la votte facesse quarche male?

«Sarria na sgratetudene, e pe chesto

Non fece a butte despiacere maie.

Che te ne pare, n'aggio ditto a siesto?

Sia beneditto quanto studïaie!»

«O Dottore, corona d'ogne tiesto,

Respose tanno Apollo, e quanto saie!

Ecco lo tallarone, e tornatenne,

Ca l'aseno te 'mpresto co le penne».

Partuto ch'isso fu, sùbbeto auzaro

Li mesale, e benettero le carte,

E Febo co le Muse accommenzaro

No iuoco che perzì s'usa a ste parte:

Reverzino se chiamma; io appe a caro

A la vecchiezza de 'mparare st'arte.

O bello iuoco, iuoco de Coccagna,

Che chi manco ne fa chillo guadagna!

Guadagnaie Febo, ed io pe paraguanto

N'appe no tredecinco nuovo nuovo,

Ma ogne Musa capezzeia tratanto,

Che de suonno già stea chiena com'uovo.

S'auzaro addonca, e l'una a l'autra accanto

'Mpizzare a l'uocchie se sentea no chiuovo;

Febo perzì storduto se stennecchia

'Mmiezo a la sala, a na coperta vecchia.

Io scengo a lo cortiglio e m'addormento

Co gran gusto, appoiato a no cantone,

E beo, dormenno, co no gran contento

(Non saccio se fu suonno o vesïone)

Na femmena cchiù lustra de l'argiento

Che portava l'ascelle e no trommone,

Dicenno: «Chi fu maie da Battro a Tile

Famuso cchiù del Cavalier Basile?

«Da chisso ha schiacco matto ogne Scrittore,

O sia toscano, o grieco, o sia latino,

Chisto ha no stile che l'ha fatto 'nore

Quanto lo sole fa luongo cammino;

Isso se fa la via co lo valore

A la grolia, e ne schiatte lo destino,

Ca mo è d'Apollo commo frate caro,

E le vò bene de le Muse a paro».

Dire non saparria quanto sentiette

Piacere audenno nnommenare a chillo

Che la fortuna ammico me facette

Da che ghieva a la scola peccerillo.

'N chesto chella e lo suonno me foiette

E sómme auzato lieggio comm'a grillo,

Ma sempe aviette ed aggio 'nnanze chella

Doce a l'aurecchie, e all'uocchie accossì bella.