SECUNNO

Manna Cerriglio a Sarchia cierte cive

Che no gran Nigromanto avea 'ncantate;

Isso, ch'è furbo, a cierte li cchiù arcive

Ordena tanno che siano iettate;

Ma chille, pe non c'essere corrive,

Se le 'nnorcaino e fuino trasformate:

Sarchia se 'nfumma e fa che la serrecchia

Ogn'ommo ammola, e all'arme s'apparecchia.

Già 'sceva da la porta de Levante

La zitella de Febo co Titone.

E ghiea scopanno ed adacquanno 'nnante

Le chiazze addove passa lo patrone:

Già steva lesto ogne ncavallo e 'nfante

De lo desederuso Sarchiapone,

E de Cerriglio la gran compagnia

Già se ieva accostanno tuttavia.

Ma Sarchia mo, vedenno ianchïare

Lo cielo, e ghietta' stizze comm'a burro,

Sùbbeto commandaie ch'ad ammarciare

Se sonasse lo cuorno e lo tammurro.

Ogne ncompagno se sentìje allegrare,

Ch'audiste no marmuoito e no susurro:

«Priesto, ammarciammo, priesto, allegramente»,

Diceva Sarchiapone a chella gente.

'Nzembra co lloro ieano cchiù de mille

Gridanno tutte e facenno gran festa,

Giuvene, viecchie, granne e peccerille,

Menando chi cepolla e chi rapesta.

Cerriglio, che sentea chille gra' strille

S'affacciaie pauruso a na finesta,

E non sapea se fosse lo remmore

De la gente contraria o de 'n faore.

Ma lo Masto de Campo Cociniello

Era isso perzì quase arrivato,

Che aveva no cavallo gioveniello

Ch'era de viento a Spagna gnenetato:

La capo negra avea de schiavottiello,

A lo cuorpo era lïardo arrotato,

Li piede nigre aveva, e a li capille

Avea de nocchetelle cchiù de mille.

Quanno l'uno co ll'auto s'affrontaie

Iusto a la scesa de certe gradelle

(Ma Cociniello primmo se pigliaie

Lo puosto lesto, comme avesse ascelle)

Ogn'arfiero la 'nzegna arvolïaie

Co una mano, pe le ffa' cchiù belle

Parere, azzò vedesseno le forze

Le gente ch'a bedere erano corze.

Vedenno Sarchia lo puosto pigliare

A tutte quante li nemmice suoie,

Ne n'attemo llà fece carrïare

Diece cannune da cavalle e buoie;

E resoluto de vole' mannare

A terra le muraglie e a ffi' li puoie,

E fece fa' na mano de trencere,

E po' arvolïare le bannere.

E mente facea fa' no paviglione

Co cierte cuoire che fuino de cuocchie,

S'adonaie ca 'nmiero isso no guarzone

Venea, co cierte fecatielle e truocchie;

All'auta mano avea no carrafone

De vino, che facea lagrema' l'uocchie:

E comme fu becino se 'ncrinaie <'nchinaie>

E chelle cose a Sarchia appresentaie.

Disse: «Bonnì, Signore Sarchiapone,

Lo Re Cerriglio te basa le mano,

Ed azzò facce na colazïone

Te manna chiste fecatielle e pane.

Pigliale e non fa' scuorno a lo patrone,

Ca te le gliottarrisse sane sane,

E chesto ccà de sto carrafonciello

Te lo manna lo Signo Cociniello.

«E porzi' dice che no' ll'agge a male

Si songo poco e pareno de niente,

Ca la gioia cchiù picciola cchiù bale

E a gran Signore picciolo presiente;

E si puro so' 'nzìpete de sale

L'ha fatto ca le pareno sacciente

Chiste compagne vuostre, e si n'avite,

Sale pe 'ncoppa nce lo metterite».

Po' se ne iette, ed a rengrazïare

Mannaie Sarchiapone a chillo Re;

Po' disse: «Cierto chisto vò gabbare,

Conforme ha fatto all'aute, cossì a me.

Ma marzo ne l'ha raso, e smafarare

Lo voglio buono, sì, da vero, affé,

Ca chi vòle 'nfoscare a Sarchiapone

De sale vo magna' no galïone!

«E non se pensa ca songo a quarch'uorto

Nato, o che songo nzemprece pacchiano:

Ca so' nato e cresciuto 'mmiezo Puorto,

E d'isso cchiù me valeno le mano.

Oie o craie vedarrimmo chi ha cchiù tuorto

E chi ha cchiù lo cellevriello sano,

Se isso, che me manna a 'ntossecare,

O io, che chesto mo manno a ghiettare».

Già se lo sospecaie ca nc'era 'mbruoglio

Ma non pe chesto se spantaie de niente,

E de carta pigliaie no miezo fuoglio,

Ch'era littera scritta de pariente,

E fece co l'arrusto n'ammarfuoglio,

Pe non se fare prodere li diente;

Po' disse a duie compagne, li cchiù care,

Che lo iessero sùbbeto a ghiettare.

Le venne 'nnanze Peppo e lo Dottore,

Ed a chille ne deze lo penziero;

Venne venenno po' Tonno da fore,

Ch'era de li cavalle trommettiero,

E sentìje de l'arrusto no gra' adore

E se nce conzignaie co lo penziero:

E ghiette a chiste duïe retomane

Pe se piglia' l'arrusto e chello pane.

Comme fuino arrivate a la marina,

A na chiaveca llà fuino accostate:

Tonno co lloro priesto s'abbecina

E disse: «E meglio che ve lo magnate:

Ca starrite dïune stammatina,

Pe ffi' che non ce simmo arrezettate».

Peppo già tenne 'n mano; e lo Dottore

Disse: «Frate, chesto ha no buono adore».

Quase volenno di' 'n chillo lenguaggio

Copertamente: “Io me lo magnarria”.

Disse Peppo: «No scuto mo nce 'nguaggio

Ca morarrimmo tutte pe la via».

«Non dobitare, disse Tonno, ch'aggio

No cierto agniento a sta guarnera mia,

Che lo figlio de Masto Gianantonio

Me l'ha 'mpattato contra lo demmonio».

«Buono sarria, a Tonno tanno desse

Peppo, mente haïe chesto agniento tuio.

Ma si 'nzentore a Sarchiapone iesse

Ca no' assarvammo chist'ordene suio

Abbesognante che me ne foiesse».

Ed illo disse: «Da mo me ne fuio!

Sì tu che sì de cuorno sonatore,

Ma no' nuie, che stimammo assaie lo 'nore».

Lebbrecaie Tonno e disse: «Comm'a dire?

Non songo comm'a buie, e niente manco?»

Dissero: «Ciento vote pe morire

Simmo mente sta spata sta a lo scianco.

Tu dice ca n'è niente io foire:

O bella cosa, si fuio ed arranco!

Che se dice de uno mancatore,

Che promette e no' attenne? E traditore.

«Ma a te non t'è breogna, figlio mio,

Si fuïe, perché sì no trommettiero;

Guarda si fosse lo Dottore o io,

O quarche Capitanio o Arfïero:

Uno na vota che se ne fuìjo

Iette a cavallo 'ncoppa a no sommiero,

E pe tutto lo campo fu frustato,

E restaie 'nzempeterno sbreognato».

«Ora lassammo i' tanta parole,

O meglio o peo, non m'aggio da 'nzorare,

Ca saccio cierto ca nullo me vòle

Perché non pozzo propio apparentare:

Io aggio no prodito a cheste mole,

Volimmo, frate mio, priesto magnare?»

Tanno respose lo Dottore: «Siente,

A me puro me prodeno li diente».

«Tu porzì, Peppo disse, pare ch'agge

Dell'aseno, Dottore mio polito».

«Sì, ca tu puro de famma no' arragge,

E peo de nuie haie 'n mocca lo prodito:

Nce deverrisse fa' li veveragge,

Ca te perzöadimmo a sto commito».

Isso disse: «L'agniento su pigliammo,

Azzò nuie 'ntossecate non restammo».

Sùbbeto Tonno cacciaie n'arvariello

Che parea che nce fosse torrïaca,

Ognuno, lesto, co no sprocchetiello

Se ne pigliaie quanto n'auciello caca:

Ma lloro non sapevano ca chello

Non ce iovava manco na saràca,

Ca non c'era venino, ma no 'ncanto

Che l'avea fatto no gran Nigromanto.

Lo quale primmo fuie stodïante

De no lettore che leiea 'n Parise,

E po' co cierte gente de Levante

Pratticaie mute iuorne e mute mise;

Era tanto valente co li 'ncante

Che faceva trova' l'uommene 'mpise;

E 'nfine avea vertute cchiù de ciento,

Porzì de fa' tornare oro l'argiento.

Schirosso se chiammava, e facce e fice

Era, e no gran trellegna, e ciento facce,

Ommo che pe no truocchio e na radice

S'averria fatto arrappa' li mostacce:

Ommo che traderria doiciento ammice

Pe tre decinco o pe duie sanguinacce;

Ma si nge n'è quarcuno colarino

Te 'nprommette de fa' dell'acqua vino.

Tanno propio volevano 'ncignare

A da' prencipio a la collazïone:

Peppo, che lo schifuso steva a fare

Avea allummato lo meglio voccone,

E a lo compagno le voleva dare

No piezzo comme fosse de permone:

Isso respose: «Pare che l'adore

Io vuoie che n'aggia, e tune lo sapore».

E mente steano chi lo fecatiello

Meglio s'avesse de lloro a magnare,

Veddeno llà veni' no vozzetiello

Che na figliola portava a sbarcare.

Uno de lloro disse: «Sto doviello

Me pare che l'avessemo a llevare.

Chiammammo chesta: che ste robbe sparta

Primma che da sto luoco essa se parta».

Tonno chiammaie: «Ehi, femmena da bene,

Vienenge sparte a nuie cheste coselle».

Essa ridenno priesto se ne vene

E dà ped uno prima tre panelle,

Po' pigliaie chell'arrusto e disse: «Tene,

E tu te piglia cheste e tune chelle».

E cossì po' restaino sodesfatte

E commenzaino a sbattere da matte.

Ma chillo arrusto era già stato fatto

Da farfarella, che pozza scriare,

Che sùbbeto facea l'ommo de fatto

Nell'anemale ch'era trasformare:

Treie de chille n'erano de gatto,

Tre d'urzo, che faceano urzo tornare,

E l'aute tre de piecoro lanuto

Che l'appe Tonno 'n parte soia avuto.

Ma me besogna chiste ccà lassare

Mente steano magnanno allegramente,

Et a lo capo lloro retornare,

Che s'era arrecettato co le gente.

Era passata l'ora de magnare

E lo sole scennea 'nmierzo Occedente;

Ma Sarchia che avea 'n cuorpo no portante

Pe smorfire chiammaie a tutte quante.

S'era già sotta de lo paveglione

Seduto co na tavola rïale

(Ng'erano doie galline e no capone,

E 'n crosïone robbe co le pale)

Quanno s'allecordaie Sarchiapone

Ca Peppo avea stipato cierto sale,

E perché n'era a chella ora tornato

Senza sale le robbe appe magnato.

Ognuno assaie maravegliato steva

E no' le decea core de magnare,

Pe tutte le barracche ognuno ieva

Cercanno pe pote' l'ammice asciare:

Già Sarchia tanno commannato aveva

Che la trommetta s'avesse a sonare,

E bedde ca mancaie no trommettiere:

Isso 'ntraie cchiù 'n sospetto e cchiù 'n pensiere.

E mente stea colereco e stizzato

Vedde veni' no gatto sorïano,

E n'urzo ch'era de panne 'nfasciato,

Ch'avea da fore la capo e na mano;

Appriesso le veneva no crastato

Co quatto corne, e ghieva chiano chiano,

La coda longa che la strascinava

Che la parola sulo le mancava.

'Ntraieno tutte a chillo paviglione

Dove stea Sarchia pensuso pensuso:

Gatto era Peppo, e Tonno caperrone,

Urzo 'n fasciolla lo Dotto' Vavuso.

Ietteno a ffa' carizze a Sarchiapone,

Ma isso no' stea niente paoruso,

Ma sulo maraveglia se faceva

Comme de ll'aute cchiù carizze aveva.

Se 'nmagenaie sùbbeto lo 'mbruoglio

De che manera a lloro soccedette:

Volanno fece llà no quarto d'uoglio

Venire, e chello a bevere le dette;

Po' canoscìje l'urzo a l'arravuoglio

E a lo colore po' de le cauzette;

Ma chillo gatto 'nzino le sautaie

E la facce e la vocca le leccaie.

Chello sale che Peppo avea stipato

Se stemperaie pe tutta la perzone,

E tutto quanto deventaie salato

A chella lloro trasformazïone:

E da chesto appe po' conzederato

Ca era Peppo chillo, Sarchiapone;

E perché avea lo sale a la guarnera

Perzò salato deventato n'era.

'N consequenzia tiraino ch'era Tonno

L'auto, e stea zitto e chino de paura;

Ma cierto chesto sapere non ponno,

S'era perzì 'nmattuto a la fattura.

Cierte Martino chiammare lo vonno,

Et isso stette zitto, e po' spapura,

Ma da dereto, doie ventosetate

Che parzeno de cuorno doie sonate.

Con chesto Sarchia fuie buono chiaruto,

Et accorato muto se mostrava;

Stette no piezzo comme fosse muto,

Pe parte de parlare sospirava.

Po' disse: «Nullo stia sbäuttuto,

Compagne miei, ca correre la lava

Volimmo fa' de sti nemmice nuoste

Si state tutte comme a brecce tuoste».

E sùbbeto ordenaie che se iettasse

No banno, che all'arba la matina

Ogne sordato lesto se trovasse

Pe da' a Cerriglio l'utema roina;

'Spenzaie denare a ognuno, azzò magnasse,

Già che la notte a lloro s'abbecina,

Po' se ietteno tutte a reterare

Pe penza' buono che aveano da fare.