SETTEMO

Commo io vidde c'avea quarche tornese

Pigliaie de caudo e me venette voglia

Bello tornareménne a lo paiese,

Che 'mpenzarence schitto avea gran doglia.

Avea 'n fastidio già le bone spese,

Io ch'era usato schitto a carne e foglia:

O foglia doce, o foglia saporita,

De nuie autre rechiammo e calamita!

Che canne d'Amatusia, che lecore

De chello che llà 'ncoppa Giove licca,

Che mèle d'Ibla, c'have tanto 'nore,

Che gileppo rosato o franfellicca?

O foglia mia, fenice de sapore,

Chi dice lo contrario, che s'appicca!

Ommo privo de 'nciegno e de descurzo,

Che n'ha provato maie che cosa è turzo!

Apollo, che da vero è gran Signore

E penetra lo 'ntrinseco golìo,

Me chiamma, e pe me fare gran faore

Fece rescire lo designo mio

Dicenno: «Io saccio chello c'haie tu 'n core

Perché le cose cchiù secrete io spio:

Saccio ca tu sì muorto ed allancato

Pe no bello pignato mmaretato.

«Perzò songo contento che sbignare

Craie tu puozze a le belle toie Serene;

Ma perché a li poete li denare

Songo nnemmice, ed io te voglio bene,

Piglia sto stoiavucco e se magnare

Tu vuoie, stiennelo 'n terra e bì che bene!»

Io giubelanno tutto de preiezza

Lo piglio e ne rengrazio chell'Autezza.

E pigliato da isso e da le sore

Lecienzia, parto pede catapede,

Né l'ora veo perché de lo valore

De chella pezza faccia a l'uocchie fede.

Io creo ch'erano iusto sidece ore

Quanno a no vosco me posaie lo pede,

Dove tant'ombre tu nce vide stare

Che lo sole se caca de nce 'ntrare.

Lloco me sedo 'ncoppa de no prato

Che parea no trappito de Soria,

Mecco lo stoiavucco llà schiegato,

Ed ecco veo, ma chi lo credarria?.

No piezzo de vitella sottestato

E no pignato propio a boglia mia,

Maccarune, pasticce, caso e pane,

E grieco, mangiaguerra e mazzacane.

Io mo strasecolanno comm'a chillo

Ch'a lo Nilo, dapo' che cresce e manca,

Vede de na ranonchia o sorecillo

'Scire na capo, e mo no cuorpo o n'anca,

Po' tutto sano zompa comm'a grillo:

Cossì bedea da chella pezza ianca

'Scire miezo pïatto! Ecco ccà sano

Se vede appriesso! Ed io tutto lo schiano.

E mentre co gran gusto stea a menare

Li guoffole, e po' scioscio a na vorraccia,

Ecco de brocca no giovene appare

E me dice: «Bonnì, prode te faccia!»

Respose io: «Benmenuto!», ed assettare

Lo fice, e nce lo tiro pe le braccia.

Isso se fa pregare, e po' se lassa;

Io creo che faccia quinnece, ma scassa.

Magnato c'appe, disse: «Ommo da bene,

Tanta robba a no luoco ch'è desierto,

Dimme, de 'razia, dimme, donde vene?

Ch'io, pe te dire, me stopesco cierto!

Dillo, e te iuro, Dio me guarde a <e> tène,

Ca no' lo dico se ne iesse spierto.

Dillo, sì forasciuto e t'è portato

Da chi compone chello c'haie magnato?»

«Testemmonïa vosta, io le respose,

Arrasso sia! che dice, o cammarata?

Pe mente non me passano ste cose,

'Nnante nce fosse màmmama crepata!

Ma Febo sta ventura me refose...

(Oh potta, sta parola m'è scappata!)»

«Dilla, isso dice, ed io te mostrarraggio

Fuorze a te, po', na bella cosa c'aggio».

Tanto me disse c'averria scommuosso

N'ommo se stato fosse be' de stucco,

E pe levaremìllo po' da duosso

Io le scopierze de lo stoiavucco.

Ed isso disse: «Vróciole a no fuosso

Dove me nce sia fatto no travucco

Se non va' no tresoro! Ma a sto scianco

Porto na cosa che non vale manco».

E s'asciogliette da lo stregneturo

No fïasco de ligno lavorato,

Decenno: «Vide, aggio quarcosa io puro,

Se be' 'n Parnaso maie non songo stato».

Po' dice: «O vuie che state a chesto scuro,

'Scite mo priesto a chesto scampagnato!»

Ed ecco 'scèro, lustre comm'a sole

Chi me lo credarria?, sette fegliole!

De le quale una disse: «Ecco, Segnore,

Le schiave toie, commannale a bacchetta».

Ed isso disse: «O femmene de 'nore,

Portate no cavallo a la ginetta».

Io mo fora de me pe lo stopore

Teneva mente e steva a la veletta:

Correno chelle, ardite comm'a gallo,

E sùbbeto portaro lo cavallo.

E po' tornaro dinto lo fiaschetto,

E chillo cravaccaie pe ghiresénne.

Io mo che bisto avea sto granne affetto

De sto fïasco gran golìo me venne,

E disse: «Ammico mio buono e perfetto,

Io non aggio n'agresta, ccà, né penne

P'accattare tresoro accossì raro,

Ma cagno co sto mio, se l'haie da caro».

«Me contento, diss'isso, de cagnare»:

E accossì cagnàiemo; e camminaie.

Ma quanno venne l'ora de magnare

Ch'avea pigliato chiunzo m'addonaie,

E quanno steva per me desperare

A lo fïasco mio meglio penzaie,

E dico: «'Scite, femmene aggarbate,

E mo lo stoiavucco me portate!»

Ed ecco chelle 'sciute, ecco a no punto

Vene lo stoiavucco; io sedo 'n terra,

Lo stenno, e mentre faccio lo musso unto

Manca la famme de me fare guerra.

Già steva 'n fine, ed ecco n'autro accunto,

Non saccio se de Trocchia o de la Cerra,

E me saluta; io lo saluto e dico:

«Addove vaie, da dove viene, ammico?»

Isso s'assetta 'nnanze e po' me dice:

«Vengo, pe te la dire, da na parte

Ch'è meglio assaie dell'Isola Felice,

Che maie non basto a direténne parte:

Sacce ca pe la via notte me fice,

Ch'io non vedea né chesta o chella parte,

E mentre chiagno na bella fegliola

Vene, m'asciuca l'uocchie e me conzola.

«Oh ch'isce bella, a l'uocchie d'ogne Fata,

Che pareva na penta palommella!

Portava no dobbretto de colata,

Na cauza rossa, o Dio quant'era bella!

Na capo a la scozzese, che 'ntrezzata

Nc'era na verdegaia zagarella,

N'uocchio che frezzïava, e no mussillo

Da vasàrelo sempe a pezzechillo.

«Po' fatto a lo terreno no pertuso

Me fa 'scire pe chillo a no palazzo:

Pe te la dire, io ne restaie confuso

E n'appe a deventare quase pazzo.

Pe na grada assaie lustra saglio sùso

A na sala, addove erano a sollazzo

Cient'autre Fate belle comm'a n'oro,

Ch'ognuna porta 'ncuollo no tresoro.

«Io faccio lleverenzia e tremmo, e a pena

Pozzo tene' li curze pe paura,

Ma spara na vocella de Serena:

— Datte armo, c'haie trovato la ventura:

Non t'allecuorde quanno a chella arena

Steva a dormire na lacerta scura

E no villano accidere la voze

Ma per te la pretata no' le coze?

«Che gridaste: Sta' fermo, no' le dare!

Che t'ha fatto sta scura poverella?

E lo vraccio faciste sbarïare.

Sacce mo, cammarata, io songo chella:

Mo te volimmo ccà remmonerare

Pocca ognuna de cheste m'è sorella,

Azzò ch'ogn'autro po' venga a sapere

Ca non ce perde maie chi fa piacere —.

«Chesto ditto, me portano vedenno

Chisto bello palazzo 'ntuorno 'ntuorno:

Non pozzo dire quanto era stopenno

Se te parlasse chisto e n'autro iuorno!

Da lo palazzo a no ciardino scenno

Che n'averria lo Campo Eliso scuorno:

Ogne frutto ch'a l'arvolo è 'mpizzato

Quale è 'n composta e quale è sceroppato;

«Scorre da na fontana moscatiello,

Da n'autra manciaguerra e falanghina,

Chesta de latte fa no sciummeciello,

Chella de mèle corre a la marina:

Sponta a lo prato ccà no frutteciello,

Llà no pede de puorco 'gnielatina,

Na pergola nc'è po' de gran bellezza,

Carreca tanto che se chiega e spezza.

«Lloco de Nola nce so' sopressate,

Lloco so' de Bologna saucicciune,

Lloco saucicce belle spezïate,

Lloco a fïasco casecavallune,

Lloco 'nnoglie a Ghiugliano 'nmottonate,

Lloco presotta e caso a buonne cchiùne,

Che me parze vedere speccecata

Porta Caputo quanno sta parata.

«Lloco sotta me fanno no banchetto,

Autro che de saràche e de radice!

Vuoie autro, che me dèzero 'n guazzetto

Tutta la 'stremmetà de la fenice!

L'aucielle paradise appe 'n brodetto,

La peo chelleta fu starne e pernice.

Scomputo de magnare, ecco ogne Fata

S'àuza a fare na bella 'mpertecata.

«Se chesta fu na vista de Segnore

Penzalo tu, ca no' lo pozzo dire.

Duraie lo ballo pe no paro d'ore,

Che propio 'n bruodo io me n'aviette a ghire;

Na cétola sonava de stopore

Una de chelle, che facea dormire,

N'autra d'esse sonava no strommiento

Che doie corde facevano pe ciento.

«Fatto lo ballo nce ne iammo arreto

A lo palazzo, ed a no cammariello

Che steva a no recuoncolo segreto

So' portato, e me danno no cortiello

Decenno: — Agge assaie caro sto segreto,

Ch'addovonca lo 'mpizze e dice: Auciello!,

Sùbbeto è fatto e cinto a tutte banne

De forte mura no castiello granne —.

«Io tutto alliegro piglio sto presiento

E le rengrazio, e bàsole le mano,

E perché da lo suonno avea trommiento,

Se n'addonaro, e bello pe la mano

A no lietto me mesero d'argiento,

Addove m'addormiette chiano chiano.

Me sceto, allizzo, e raspo lo caruso,

E tròvome da fora lo pertuso».

Mentre ch'isso contava io spantecato

Steva a sentire chisto bello cunto,

E po' le dico: «Se <che> te vea 'nzorato!

Fa' che ne vea la prova a chisto punto:

Ca po' te dico, e restarraie spantato,

Che bale chisto, se be' sta sedunto».

«De 'razia», disse chillo, e quanto 'mpizza

Decenno: «Auciello», e no castiello sguizza!

Io stoppafatto resto, e mantenere

Volenno la prommessa, faccio 'ncoppa

Lo stoiavucco priesto comparere

Le menestre addorose a chioppa a chioppa:

Ch'isso pe mmaraveglia e pe piacere

Smerzaie l'uocchie e restaie commo de stoppa;

Io dico: — Mo lo pesco st'aseniello,

Ed a ste granfe vene lo cortiello! —

E dico: «Be'? N'è cosa da stordire?»

Ed isso a me: «Strasecolo, a fé mia!»

Ed io soggiongo: «Se me vuoie faurire

A cagno e scagno fare mo vorria».

Isso mostraie desgusto de sto dire,

E respose sgregnuso: «Arrasso sia

Che pe na pezza io chisto voglia dare!

Crisce la dosa se vuoie ciammellare».

Io che n'era piccato, e so' corrivo,

L'offierze lo fïasco pe refosa;

Isso vede la prova e comm'arcivo,

Sùbbeto canoscenno ch'è gran cosa,

Se contenta. Io preiato parto, e arrivo,

Sempe sautanno frisco comm'a rosa,

La sera a no casale d'Arbanise:

Ma co gran famme, e non m'àscio tornise.

«Pagame, dice l'oste, e ba' te 'mpienne,

Ca non s'alloggia ccà senza denare»;

Io respose: «Sta' zitto, frate, 'ntienne

Ca no bello castiello voglio fare».

«Se tu sì 'ntiso li piede nce stienne,

Lebrecaie chillo, appila, non parlare;

Ca pe certa raggione sottestato

Non ce vonno castiello fravecato».

Io sfilo zitto e mutto, e guatto guatto,

Conzidera tu mo co che dolore,

E pe famme facea quase lo tratto

Commo cannela che senz'uoglio more.

O male cellevriello, e che m'haie fatto?

Decea, c'avea na cosa de valore

E me la fice bello cottïare:

Lo cortiello aggio, e n'aggio che tagliare!

Lo bene non se stimma o prezza maie

Se non se perde! O stoiavucco amato

Ch'iere vero confuorto de li guaie,

Dove sì ghiuto, e chi me t'ha levato?

Fïasco mio, perché te desprezzaie?

Che mo me l'avarrisse retornato!

Magna, verlascio! Oimmé, sto pe despietto

Pe me 'mpizzare sto cortiello 'mpietto!

Dovonca vao tento la sciorte mia

Pe fare a quarche parte sto castiello,

Ma chesta tene ognuno ch'è pazzia

E dice: «A lo 'spetale, o poveriello!»

Vago a Spagna e a Sciorenza, e manco cria

Faccio, se be' ne mostro lo modiello;

Vago a tant'autre terre, ognuno dice:

«Va' piglia le cient'ova, ommo 'nfelice!»

E dapo' tanta guaie e tanta stiente

A Napole mio bello so' tornato,

Ma non trovo né ammice né pariente

Da quale potesse essere aiutato.

Puro sta cosa a me non se dà <sa de> niente,

Ca m'aggio 'n cataròzzola chiavato,

A crepantiglia d'ogne caperrone,

Co sto cortiello fàreme Barone.

Tutta la notte penzo a lo designo

E chiammo gente e faccio mille patte:

Mo nce acconcio na sala e no soppigno,

Mo tronère, mo fuosse e torre chiatte,

Mo cantine pe lagrema e sorvigno,

Mo porte, mo fenestre e casematte:

Quanno è po' fatto che me stisso spanta

N'aggio luoco de fàrence la chianca <chianta>.

De Lemos chillo Conte, che fa guerra

A la 'nmidia e a lo tiempo, me prommese

De fàreme acquistare tanta terra

Che lo potesse fare a sto paiese;

Ecco, se parte, e sta speranza sferra:

O fortuna contraria ad aute 'nprese!

Lo frate puro s'è de me scordato,

Che m'avea de speranze 'nmottonato.

Macare me potesse cenzoare

Quarcosa nmiero de Capo de Monte:

Oh che bello castiello vorria fare,

Addove se trasesse pe no ponte!

Tutto de 'ntuorno lo vorria murare

E po' stàrence dinto comm'a conte.

Che magne po'? Lo venno. E a che palazzo

Po' staie? Ne faccio n'autro... Oimmé, so' pazzo!

Sto penziero m'allarga da la Musa,

Chisto 'scire me fa de cellevriello,

E chisto pe freneteco m'accusa

A tutt'ore penzanno a sto castiello:

Ad ogne bene m'è la porta chiusa,

Mannaggia chi me deze sto cortiello!

Cossì ba chi è catarchio ed è pacchiano

E cerca meglio pane che de grano.