TIERZO

Venuto Franco e Modio a la presenzia

De Febo, prunte assaie pe lo servire,

Fecero a la spagnola lleverenzia

E che commanna stezero a sentire;

Lo quale 'mprimmo, fattole accoglienzia,

Le disse: «Chi de vuie me sape a dire,

Pe cosa ch'a lo munno assaie besogna,

Se l'avere le corna sia vregogna?»

Franco respose: «Io songo de parere

Che l'avere le corna senga 'nore.

E te lo faccio co l'uocchie abbedere,

Pocca me lo commanne, o gran Signore:

Se lo cchiù de li Deie pe le tenere

Fecero ciento 'mbroglie a tutte l'ore,

Eccote ca le corna so' 'norate

Pocca li meglio Deie l'hanno portate.

«Tu saie ca Giove, ch'è lo capo lloro,

Quanno se 'nnammoraie d'Europa bella

Non se facette na chiòppetta d'oro,

O, commo pòte, na lucente stella:

Ma co doie corna se fece no toro

E portàiela a cavallo senza sella:

Stimanno che sia meglio a chi fa festa

Portare corna che pennacchio 'n testa.

«Quanno Acheloo facette accostiune <a costiune>

Co Ercole, de che se pigliaie scuorno?

Fuorze ca levaie buone secozzune,

Che 'ntommacato stìje cchiù de no iuorno?

Non se curaie de chesso: li premmune

L'abbottaro perch, perdìje no cuorno,

E se tenne pezzente e sbregognato

Ca schitto co no cuorno era restato.

«Tu saie ca fra le cose cchiù 'norate

Che s'àsciano a lo regno de le stelle

Eie la Luna, e puro le so' nate

Ogne mese fi' mo le cornecelle,

E non darria le corna 'nnargentate

Pe quanta so' llà 'ncoppa cose belle,

Ed autro e tanto diceno a lo tuorno,

Co lo Tauro, Arïete e Crapecuorno.

«E pe li vuosche Pane e <s>s'autre gente

Che le vàceno appriesso a tutte l'ore,

Quanto se tene ognuno sia potente

E a pede chiuppo passare lo 'nore?

E perché? Pe le corna solamente

Che da la capo soa spontano fore.

Addonca, se so' tanto cosa bona

'Norato è chi de corna se 'ncorona.

«E pe lo munno quanta Ri famuse

Nce foro, che le corna le spontaro,

Che no' schitto no' stèro vregognuse,

Ma cchiù 'norate e granne se stimaro?

E quanta nce ne foro 'mmedïuse

Che pe l'avere lloro spantecaro?

So' cchiù de mille, e gente de rechippo,

E nfra l'autre de 'Talia lo Re Cippo.

«Lo quale, de l'avere desïuso

Mentre de tore na guerra vedeva

S'addormette, de sciorte golïuso,

Che quanno se scetaie le corna aveva;

Po' sempe che toccava lo caruso

Cchiù 'norato de l'autre se teneva,

E perché no' le fossero arrobbate

De corona le tenne 'ntornïate».

«So', disse Apollo, ste raggiune vere,

Ma chille c'oie se chiammano “cornute”

So' chille c'hanno triste le mogliere,

E fanno che deventano papute:

Ma c'aggiano a la capo corna vere,

Commo chisse, fi' mo chi l'ha bedute?

Perrò vorria sapere commo e quale

So' chiammate “cornute” chisse tale».

«S'io non me gabbo, Franco responnette,

Ogne ricco è potente comm'a stella,

Co favure e denare 'n cielo mette

Conca have e presta la mogliere bella;

Sforgiano chelle po', fanno banchette,

Ed hanno sempre chiena la scarzella:

Le dice po' chi sta recchezza vede:

— Cierto lo cuornocopia isso possede —.

«E s'ha lo cuornocopia co raggione

Se le pò dire che “cornuto” sia;

Non perrò dico schitto a le perzone

Ch'acquistato se l'hanno pe ssa via.

Ora sentite mo l'openïone

De Modio, fuorze vace co la mia».

«Dica», dicette Apollo: e Modio priesto

Accommenzaie quanno fu miso a siesto.

«Signore Apollo mio, so' de parere

Che li tanto ammoruse ed abbonate

Che non hanno pe male de vedere

Che le mogliere le siano trottate,

Quanno fàceno tanto gran piacere

Da le gente “cornute” so' chiammate

Perché tanto coïeto e manzo è fatto

Che de voïe te pare no retratto.

«Se me dirraie: — Le gente valorose,

Che non vonno ste cose comportare,

S'hanno mogliere po' proffedïose

Che 'n ogne muodo nce le bonno fare,

Mentre le fanno de muodo annascose

Che maie non se ne pòteno addonare

Per che raggione, essenno scommogliato,

Puro “becco cornuto” isso è chiammato? —

«Mo ve lo dico: da sapere aggiate

Che quanno Bacco li Griece faureva,

De tutte quante l'autre gente armate

Isso sulo a lo duppio cchiù baleva:

Le gente greche, che non foro sgrate,

Ed ognuno laudare lo voleva,

Pe dire ch'era no valente raro

“Bacco cornuto” sempe lo chiammaro.

«Perché “cornuto” tanno volea dire

N'ommo forte e balente co la spata:

Ora mo, quanno è n'ommo tutto ardire

E cchiù balente de tutta n'armata,

Ch'è n'autro Bacco volen<n>o scoprire,

Se l'have la mogliere l'a cagnata,

“Bacco cornuto” dire hanno voluto

Ed hanno ditto ch'è “Becco cornuto”

«Ma cornuto non è chi non consente,

Né dace a la mogliere accasïone

Farele 'n carta pecora patente

Commo de Cornovaglia è campïone:

Commo quanno ped essere valente

Che nullo nce le faccia ha openïone,

O perché la mogliere sia 'norata,

La gabba e stace sempe a la squitata.

«Perché, sia quanto vuoie 'norata e bona,

Se se ne squita e no' le veglia adduosso,

Ed essa vede ch'isso l'abbannona

E ch'a zappare va quarch'autro fuosso,

Gelosia tanto forte la sperona

Che nce lo mette lo cappiello d'uosso:

E se be' fosse Orlanno Palladino

Co raggione lo chiammano Martino».

«E s'è buono marito, e sempe face

Chello che deve commo no lione,

Decette Apollo, e chella puro vace

Dove chess'autre che n'hanno raggione,

Perché lo munno le corna le dace?

Ora levàte sta confusïone:

Ca chi da la mogliere sia gabbato

E no' nce ha corpa, non è sbregognato.

«Addonca quanno na scrofa squartata

Vò propio fare chello che n'è ghiusto,

Have d'avere tutta na casata,

Che no' nce ha corpa, vregogna e desgusto?

E la famma ha da essere ammacchiata

De no marito ch'è 'norato e ghiusto?

No, no! Sia fatta ad essa ssa vregogna,

Ch'ad ogne auciello è fatta na carogna.

«Starria frisco lo Re de Cercassia

C'avea pigliata na mogliere bella:

Né lo vottava niente gelosia,

Né le facea sospetto l'ancarella,

Né se curava farele la spia

Tanto l'avea pe bona e nzemprecella,

E le pareva potere iurare

Ca manco sapea l'acqua 'ntrovolare.

«Tanto cchiù che no iuorno stanno 'n chietta

No schiecco le mostraie, che se vedesse,

Ed essa, che lo luoco e tiempo aspetta,

Mostraie na gran paura e se sorresse:

— Chi è chisto?, disse, oimmé! Iettalo, ietta!

Nc'è n'ommo, e non vorria che me vedesse;

Cchiù priesto me sficcaglio co no spito

C'autro me vega maie che tu, marito —.

«Lo Re disse: — A la fe', chesta è 'norata! —

E ne steva contento e sodesfatto,

E a lo ciardino avennola portata

L'ecciacuorvo le fece n'autro tratto:

C'a na peschèra essennose accostata,

Disse: — No' stongo ccà pe nullo patto,

Che non me vega, se pe sciorte n'esce

Da st'acqua, na ranonchia o quarche pesce —.

«Po' se vota, e bedenno no froncillo

Cantare sopra n'arvolo de chiuppo,

Dice: — Se st'aucelluccio è mascolillo

Io mo me scippo tutto chisto tuppo,

Ca non voglio maie, granne o peccerillo,

Che dia co l'uocchie a chisto 'nore 'ntuppo.

Ia<m>moncénne, Signore! Oimmé, so' morta,

Ca chesta è cosa ch'a lo 'nore 'mporta! —

«Stea de chesto lo Re tutto preiato,

Penzanno avere na mogliere bona;

E deceva fra sé: — Me so' 'nzorato

Co chi de le mogliere è la corona! —

Quanno, ched è?, ched è?, s'ascia 'ncappato

Co la cchiù fàuza e la cchiù gran potrona,

E trincata e foiosa e 'sgrata e trista

Che pe tutto lo munno se sia vista.

«Pocca aveva fi' a binte dammecelle

Che le devano muorze cannarute,

Ca, si be' co le trezze a canestrelle

Commo femmene stevano vestute,

Erano tutte sotta le gonnelle

Li meglio mascolune e cchiù tregliute!

Chesta donca a lo Re vregogna dace?

Sbregognata senga essa che lo face.

«O bella cosa chelle gente antiche

Che non erano tanto scropolose,

Ma de fare piacere tant'ammiche

Che teneano 'n commune tutte cose!

Saie s'a Romma le gente so' podiche,

E se fecero legge aute e famose:

E bòzero le gente cchiù 'norate

Che le mogliere fossero prestate.

«Zoè, s'uno l'avea che non 'mprenava

E n'autro che assaie figlie le faceva,

Chisto a chillo la soia le prestava

Fi' 'ntanto che l'ammico figlie aveva;

E fatto chesto po' se la pigliava

E cchiù 'norato assaie se ne teneva,

Comm'a Napole spisso le commare

Le bóccole se sòleno 'mprestare.

«— Oh, me dirraie, fu quarche bozzacchione,

Quarche pacchiano ch'a la bona ieva,

Che mettennolo dinto a no cestone

Puro commo ascialè contento steva —.

Vuie sapite chi fu lo gran Catone,

Sapite si fu sàpio e si valeva,

E puro la mogliere Marzia bella

Prestaie, commo se fosse ciucciarella.

«Pisìstrato tiranno fu d'Atene,

E si be' ca Trasìbolo vasaie

La figlia, isso fu tanto ommo da bene

Ch'allegramente nce la perdonaie.

La mogliere diceva: — Oh mara mene!

E commo la mennetta non ne faie? —

Diss'isso: — Eh, ca s'accide lo nnemmico,

Non chi vasa, e bò bene, e t'èie ammico —.

«Agi' Re non sapea pe cosa chiara

Ch'Alcebiade stea co la Reggina?

E puro sempe maie la tenne cara,

E le dìjo l'ova fresche ogne matina;

E pe mostrare na bontà cchiù rara,

Potenno fare de l'ommo tonnina,

No' schitto no' le voze fare male,

Ma fece a laude soa no matrecale.

«E Agusto, de lo munno 'Mparatore,

Quanto de chiste scrupole se rise?

Pocca tenette pe no granne 'nore

Pigliare Livia prena de seie mise,

E le portaie cchiù sbisciolato ammore

Che non se porta mone a li tornise,

Parennole che fosse na ventura,

Commo chi accatta e non paga fattura.

«A lo figlio de Silla non fu ditto

Ca la sore, che l'era tanto cara,

Co Furvio se 'mbrogliava, ch'era guitto,

Figlio de na guaguina lavannara?

Ed isso alliegro responnette: — Zitto,

Ca sòrema ha no 'nciegno che le para:

Ca sta co uno, che se n'è allordata?

La mamma le pò fare na colata —.

«E se non burla, ma dice da vero

Chillo Grieco senz'acqua accossì bravo,

Lo gran cecato che se chiamma Omero,

Che de le Muse se pò dire vavo:

Non se tenne 'norato Cavaliero,

Recoperanno Alèna, Menelavo,

Se be' ch'era foiuta a Troia e torna

Magnato avenno pane de cchiù forna?

«Se Vorcano è 'norato vecchiariello

Se sape 'n cielo e ped ogn'autra parte,

Se be' a la rezza pigliaie comm'auciello

Venere ch'abbracciata stea co Marte;

E mo fare vorriano lo maciello

De quanta so' che 'mbrogliano le carte:

Lassatele campare: ed aggia schitto

La vregogna chi face lo dellitto.

«Perché te pienze che chiammato Magno

Fosse Alisantro, ch'era gran Signore?

Fu schitto ca fu tanto buon compagno

Che pe sse cose maie fece remmore:

Ecco, quanno la figlia fece a cagno,

E pe no 'ntruglio dìjo tutto lo 'nore,

Dicette: — Io manco sale me ne curo,

Voglio parte a lo Regno, aggia essa puro —.

«Astilpone, felosofo valente,

N'appe na figlia puro cannaruta

Che magnava e beveva allegramente

E fu cchiù bote co n'ommo cogliuta?

Quanno le ieze a dire no parente

Ca le facea vregogna, la cornuta,

Respose: — Faccia puro a tutte l'ore,

Ch'io pe me sempe maie le faccio 'nore —.

«Vonno che perda mo 'nore e decoro

Pe na femmena lèggia comm'a biento

N'ommo da bene, e commo fosse toro

Aggia le corna: chisto è gran tormiento.

S'è chesso, comm'appriesso a l'aità d'oro

Venette a cola' po' chella d'argiento,

A chesta, ch'è de fierro fi' a sto iuorno,

Appriesso venarrà n'autra de cuorno».

Venuto era lo Bernia pe sentire

Chisto descurzo fatto a la 'ntrellice,

E non potenno propio cchiù zoffrire

Senza lecienzia isso responne e dice:

«Pe sti dìcote e dìsseme scompire

Facite mo commo sto fusto dice:

Che nullo cchiù se 'nzore 'mpenzamiento,

E levarrimmo tanto frusciamiento».

«Va' stìpate ssa vocca pe le fico,

Appila, ch'esce feccia!, Apollo tanno

Respose, ca sarria cchiù gruosso 'ntrico

E de lo munno assaie cchiù scuorno e danno.

Io t'aggio ditto, e n'autra vota dico,

Ca le mogliere vregogna non fanno,

E chi sprezzare vò lo matremmonio

E no frate carnale a lo demmonio.

«Addonca quanno n'ommo s'è 'nmarcato

E pe borrasca scassa lo vasciello

S'ha da tenere pe no sbregognato?

Zitto, ca non avite cellevriello!

O se quarche mercante arresecato

Pe desgrazia è falluto e poveriello,

E digno de vregogna? Ora va', iate

Ca n'è lo vero: è digno de piatate.

«Se canosce ca tu non haie leiuto

Ca de Lacedemonïe a lo Stato

Chi n'avea la mogliere era tenuto

No 'nfammo, ed era sùbbeto cacciato;

E ca Romane puro hanno voluto

Che da l'affizio suo fosse scacato

Ogne Dïale a chi pe mala sciorte

Fosse venuta la mogliere a morte.

«'Nfine, mogliere dévese pigliare

Perché lo matremonio è bona cosa:

Ma l'ommo sàpio se la deve asciare

Quanto cchiù pò 'norata e bertolosa,

Pocca mentre la piglia c'aggia a fare

Razza, s'essa è na trista n'è gran cosa,

Se <ca> li figlie so' peo, e stanno fitte

A le doglie de capo che so' ditte».

Po' disse: «Bona sera», e se chiavaie

Dinto la casa, e fécese scauzare;

Po' sùbbeto a lo lietto se 'nfrocchiaie,

E 'nfrocchiato se mése a roncïare.

L'Ore, mo, chi li piede le grattaie,

Chi lo commoglia e chi le va a portare

Lo necessario a capo, addove mette

Carte de matrecale e de sonette.