Trivolo vattuto

Venite, o chiante, co selluzze, a tommola,

Currite, o trivole,

Trommiente a cuofane

Facite a st' arma fa' na capotommola!

Core, e che spiere tu

D' ave' allegrezza cchiù?

Non c' èie esca cchiù, none, o maro te,

Ca Cecca è morta, oimé.

Perdiette quanto bene avea a sto munno

E so' restato già scuro e scontente,

E quanto cchiù me voto e sguardo a tunno

Tanto me trovo cchiù nigro e dolente.

Ma che spero de fa' si Cecca mia

È morta, arrasso sia?

Venite, o chiante, co selluzze, a tommola,

Currite, o trivole,

Trommiente a cuofane,

Facite a st' arma fa' na capotommola!

Core, e che spiere tu

D' ave' allegrezza cchiù?

Non c' èie esca cchiù, none, o maro te,

Ca Cecca è morta, oimé.

Tanta è la doglia c' aggio a chisto pietto

Che m' ha fatto cchiù berde de fenucchio,

E m' ha reddutto a tale lo despietto

Che nudo e crudo sto comme a peducchio.

Ma peo starraggio, o maro mene, affritto,

Ca Cecca è ghiuta a mitto.

Venite, o chiante, co selluzze, a tommola,

Currite, o trivole,

Trommiente a cuofane,

Facite a st' arma fa' na capotommola!

Core, e che spiere tu

D' ave' allegrezza cchiù?

Non c' èie esca, cchiù, none, o maro te,

Ca Cecca è morta, oimé.

Da chisto munno Cecca ha già barato

E chiuse pe la porva ha li belle uocchie

('N funno de maro, aimé, sia nnommenato!)

Ca Morte le facette li 'mpapuocchie:

Perzò me chiove sempe e zella e càiro

Ca Cecca ha mutat' airo.

Venite, o chiante, co selluzze, a tommola,

Currite, o trivole,

Trommiente a cuofane,

Facite a st' arma fa' na capotommola!

Core, e che spiere tu

D' ave' allegrezza cchiù?

Non c' èie esca cchiù, none, o maro te,

Ca Cecca è morta, oimé.

Cecca se n' ha portato già cod essa

Quanta sperava de contiente e spasse,

Ed è sta vita mia fatta na vessa

Che tanto fete cchiù, ca non fa schiasse.

Vecco, sto zitto, ch' è st' arma agghiaiata,

Ca Cecca è appalorciata.

Venite, o chiante, co selluzze, a tommola,

Currite, o trivole,

Trommiente a cuofane,

Facite a st' arma fa' na capotommola!

Core, e che spiere tu

D' ave' allegrezza cchiù?

Non c' èie esca cchiù, none, o maro te,

Ca Cecca è morta, oimé.

Pocca a l' anne de Cecca sso scassone

Haie fatto, o Morte spremmentata e secca,

Vecco ca scasso io mo sto calascione

Comme haie scassata tu la vita a Cecca.

Ma si vuoie fare buono, me ne porta

Co Cecca mia ch' è morta!

Venite, o chiante, co selluzze, a tommola,

Currite, o trivole,

Trommiente a cuofane,

Facite a st' arma fa' na capotommola!

Core, e che spiere tu

D' ave' allegrezza cchiù?

Non c' èie esca cchiù, none, o maro te,

Ca Cecca è morta, oimé.