XII : De quodam malo

Ben son zà vinti anni pasai

ch'e' no vi cotal yverno,

che li omi à deslavorai

e faiti star gran parte inderno.

Lo sol no à daito splendor

per gran grevor de nuvelao;

ogni re' vento è stao spessor

en nostro dano avexendao.

Ni renovar ò visto luna,

zà è passao pu de trei meixi,

se no con bruda e con fortuna

de vento pobjo e bacaneixi,

con troin e lampi e gran zelor,

gragnora e jazo e gran nevere,

chi n' àn guerrezai tutor

en monto guise e mainere.

Ma capeler e zocorai

per li gran fanghi e tempi croi

an guaagnao ben assai;

se no che son mancai de szhoi.

E questi tempi marastrui,

zo me par e sì se dixe,

da lebezho son vegnui,

chi n'è stao sempre raixe.

Ma piaxa a De' che vento grego,

chi de lebezho è contrario,

d'esti re' venti sea'n mego,

revozando cartolario.

Ma per tuti esti caxi re'

no dé l'omo mormorar

ni corrozasse contra De',

chi sa ben ch'El à a far.

Chè s'El è paire e noi fijoi,

li qua 'Lo vé semper falir,

per mejo dàne li ben Soi

ben ne dé bater e ferir.

Ché enderno è mato stao

chi de lo mar no sosten dano,

e noi sempre àmo meritao

d'aver mar, breiga e 'fano.

Ché mejo sa lo mego bon

zo che a l'enfermo fa mester,

ca quello chi jaxe in passion,

chi sempre à gran dol e penser.

Unde ogn' omo deverea,

per scampar de mortar penna,

piaxer zo che De' farea,

chi cel e terra guìa e menna,

e semper avrì li ogi inver' Lui,

chi è nostra luxe e segno,

chi cozì n'à mixi nui

per vestìne in lo So regno.