XVI: De condicione civitate Ianuae
Da Venexïa vegnando,
trovai un me' hoster a Brexa,
chi, comeigo raxonando,
dixe: «E' prego no ve increxa,
respondìme per vostro honor
a zo de che e' ve spïerò;
ché speso ne odo gran remor,
ni e' la veritae no so.
De Zenöa tanto odo dir
che l'è de tuti ben guarnia,
che volunter voreiva oyr
de lo so stao una partia,
e s'è la terra in rivera
ni è possante per responde
a questa gente sobrera
chi la percaza de confonder:
zo vojo e' dir Venecian,
chi se raxona inter noi
en forza de mar sovran,
e ben se cointan per un doi.
De Zenöa nïente so,
ché uncamai e' no ge foi;
e volenter intenderò
de zo la veritae da voi.
En Venexia son e' stao:
terra par de gran possanza
e de for à gran contao;
e perzò fa gran burbanza
de vitorie strapassae.
Ma Zenoeisi mai no vi,
ni ne so la veritae:
dìmela, se De' v'ahì!».
Alantor e' gi respoxi:
«No dén veritae celar
queli chi ne son semoxi;
però ve vojo satisfar.
Zenöa è ben de tal poër,
che no è da maravejar
se voi no lo poëi saver
per da loitam odir contar:
ché e' mesmo chi ne son nao
no so ben dir pinnamente
ni destinguer lo so stao,
tanto è nobel e posente.
E s'e' vorese dir parole
per far mermanza dei nimixi,
voi me terexi per folle;
ma e' lor tegno berbixi.
Ché chi in so loso habonda
e in faito ha mancamento,
par a mi che se confonda;
ma l'overa dà compimento.
Ben è ver che nostra terra,
Venician desprexïando,
en una strappassâ guerra
de stranger a sodo armando
per sparmià la söa gente
e no voreigi dar afano,
no armando ordenâmente,
ben sostegne alcun dano.
Ma, como sempre som proai
sì otramar como de za,
soi lozi son ben parezai
antigamenti, e De' lo sa.
Or laso e' star questa raxon,
e torno a zo de che spïasti;
e diròve zo che e' don,
perzò che me ne spïasti.
Zenöa è citae pinna
de gente e de ogni ben fornia;
con so porto a–ra marina
porta è de Lombardia.
Guarnia è de streiti passi,
e de provo e de loitam
de montagne forti xassi
per no venir in otrui man:
ché nixum prince ni baron
unca poè quela citae
meter in sugigacion,
ni trar de soa franchitae.
Murao à bello e adorno
chi la circonda tuto intorno,
con riva for de lo murao:
per che no g'è mester fossao.
Da mar è averta maormente
e guarda quaxi inver' ponente:
lo porto ha bello, a me' parer,
per so navilïo tener;
ma perzò che la natura
gi dè poco revotura,
li nostri antighi e chi son aor
g'àn faito e fan un tar lavor,
per maraveja vêr se sor,
e sì fi apellao lo maor;
per far bon lo dito porto
è pur coverto e pu retorto,
edificao su'n la marina
con saxi e mata e con cazina,
chi pu costa in veritae
ca no var una citae.
En cò sta sempre un gran fanà,
chi a le nave mostra intrar,
contra l'atro de Co–de–fa,
chi lonzi ie fo un mijar.
Lì è corone ordenae
unde le nave stan ligae,
e la fontanna bella e monda
chi a le nave aygu' abonda.
Zeyxa g'è e darsenà
chi a Pisan arbego dà,
e un gran paraxo da lao
chi a prexon albergo e stao.
Questa citae è eciamdé
tuta pinna da cò a pe'
de paraxi e casamenti
e de monti atri axïamenti,
de grande aoture e claritae
dentro e de for ben agregae,
con tore in grande quantitae
chi tuta adornan la citae.
En la qua e sempre e tutavia
abonda monto mercantia
de Romania e d'otrar mar
e de tuti li aotri logar.
Ze, chi destinguer porrea
de quante mainere sea
li car naxici e li cendai,
xamiti, drapi dorai,
le care pene e i ermerin,
leticie, vai e i arcornim
e l'atra pelizaria?
chi menna tanta mercantia,
peiver, zenzavro e moscao,
chi g'e tanto manezao,
e speciarie grosse e sotir
chi no se porëan dir,
perle e prëe precïose
e joye maravejose
e le atre cosse che marcanti
ge mennan da tuti canti?
Chi le vorese devisar,
tropo averëa recontar.
E como per le contrae
sun le buteghe ordenae!
Ché queli chi sum d'un'arte
stan quaxi insem{e} da tute parte.
De queste mercantie fine
le buteghe ne stan pinne:
ben pinamente omo speiga
gran merze in vota e in butega.
Pu me deleto in veritae
quando e' vego per citae
buteghe averte con soe cose,
che quando e' le vego pjose;
e 'n domenega e in festa,
se la fose cosa honesta,
mai no jose le vorea,
ché vêr dentro ò gran covea.
Tanti e tai son li menestrai
chi pusor arte san far,
che ogni cossa che tu vòi
encontenente aver la pòi:
se tu ài dinar intorno,
pensa pû de star adorno.
Ché se lombardo o atra gente
ge vennem per qualche accidente,
la vista de le belle joie
gi fa tornà le borse croye:
ché gran deleto d'acatar
strepa a monti omi li dinar.
Un specïar à monta via
pu peiver o mercantia
e in pu grosa quantitae
ca un'atra gran citae.
Monto son omi pietosi
e secoren besegnoxi;
a rendui e a forender,
a tuti gran limosener.
Tute terre de Lombardia
per porvetae e per famia
lì declinan per scampar
o per meaja o per dinar.
Emperzò crëo che De'
de monti avegnimenti re'
l'à sempre defeisa e rezua
e a grande honor tegnua.
Sì drua terr' è de le barestre
e sì ne son le gente destre,
che per venze söe guerre
ben n'à per doe atre terre.
Lor navilio è sì grande,
per tuto lo mar se spande;
sì riche van le nave soe
che ben var d'atre l'una doe.
E tanti sun li Zenoexi
e per lo mondo sì destexi,
che und'eli van o stan
un'atra Zenöa ge fan.
De ben vestir, de belo asneise
cascaum par un marcheise;
lor camairere e lor scüer
paren pur done e cavarer;
e le done sì ben ornae
paren reine in veritae,
sì fornie de gran vestir
che no se pò contar né dir.
Ma si ne fan taror superzho
chi gi rompe lo coverjhu;
ma tanti son li guagni lor,
recoverai son en men d'or.
De ben far festa e covïar
e tener corte e bagordar,
nobilitae e tuto honor,
mai no ne visti par de lor.
De gente è la citae sì spesa
che chi va entro per esa
entanto gi convene andar,
chi so camin vor despazhar.
Tanta è la gente strangera
e de citae e de rivera,
con legni grossi e menui
chi de cose venen drui,
ognunca dì, serra e matin,
tropo è carcao quelo camin,
E ben à pu süa rivera
de cento mija de staera
e da levante e da ponente,
chi son de mar sì destra gente
e de combacte sì sobré
che ben par quando è mester.
Otra Zovo àn castele e homi
chi son valenti e sì prudomi,
e tanta atra forte terra
chi i enemixi de for serra.
E tante galee pò armar
pur de soa gente nostrà
che per grevi accidenti
e armarà ben duxenti;
e sì richi e de grande entrae,
de grande honor e franchitae,
tropu me recrexeria a dir
e for' a voi de tanto oir.
Ma per certo sapjai ben
ch' e' no v' ò dito lo centen,
tanto è lo possente stao
de grandeza che De' i à dao.
Genoeixi breiga schivan,
ma, se Venecian s'abrivam
en voler guerra comenzar,
guardese de trabucar
e ponnan mente a li Pissan,
chi, cubitando eser sovram
e sobranzar li Genoeixi,
son quaxi tuti morti e preisi
e vegnui sote lor pe'
per gran züixo de De'.
Chi à la mente tropo ativa
en maor squaxo deriva».
Lantor me' hosté me respuse:
«Ben m'avei le cose expose
ch' e' dexirava de saver,
e gran covëa l'ò de vêr.
Segondo ch' e' ve odo cointar,
ben è mato, zo me par,
chi Venecïan conseja
che con lor faran garbeja;
e de l'onor ch'eli se dàm
pens' ê lor cor esser pû van,
chi se dàn, senza far stormo,
aver venzuo faczo colmo.
Ma pur piaxa a De' verase
che inter lor facza paxe,
o tar tregua ge mantenga
che far guerra no convegna».